Энг яхши микрокредит ва автокредит ставкаларини қайси банклар таклиф қилмоқда?

Марказий банк мамлакатдаги тижорат банклари томонидан аҳолига ажратилаётган микроқарз ва автокредитлар бўйича ўртача фоиз ставкаларини янгилади.

2026-йил 7-сентябр ҳолатига микроқарзлар бўйича ўртача фоиз ставкаси 29,6 фоизни, автокредитлар бўйича эса 21,6 фоизни ташкил этди. Ўтган ҳафтада бу кўрсаткичлар мос равишда 29,1 ва 21,6 фоиз бўлганди.

Микроқарз ставкалари

Микроқарзлар сегментида энг паст фоиз ставкаси 24,3 фоиз билан «Asia Alliance bank» ва «Infinbank»да қайд этилди. Кейинги ўринларда «Trastbank» — 24,7 фоиз, «Aloqabank» ва «Milliy bank» — 24,9 фоиз ставка билан жойлашди.

Шунингдек, «Universal bank» 25,2 фоиз, «BRB» 25,3 фоиз, «Agrobank» 25,8 фоиз, «Mikrokreditbank» 26,9 фоиз, «Xalq banki» ва «Kapital bank» 27,0 фоиз ставкада микроқарз таклиф қилмоқда.

«SQB»да микроқарз ставкаси 27,4 фоиз, «Poytaxt bank»да 27,5 фоиз, «Asaka bank»да 27,7 фоизни ташкил этмоқда. «OFB» 28,5 фоиз, «Garant bank» 29,5 фоиз ва «Hamkorbank» 30,1 фоиз ставка таклиф қилмоқда.

Юқори ставкалар «Apex bank»да 31,1 фоиз, «Madad Invest bank»да 31,2 фоиз, «Davr bank»да 34,2 фоиз ва «Ipoteka bank»да 34,3 фоиз билан қайд этилган. Энг юқори ставка «Anor bank»да — 41,4 фоиз.

Автокредит ставкалари

Автокредитлар бўйича энг паст ставка 18,3 фоиз билан «BRB»да қайд этилди. Кейинги ўринларда «Aloqabank» — 18,4 фоиз, «Ipoteka bank» — 19,2 фоиз, «Apex bank» — 20,0 фоиз ҳамда «Garant bank» — 20,4 фоиз ставка билан жойлашди.

Шунингдек, «Milliy bank» 20,5 фоиз, «Ipak yuli bank» 21,1 фоиз, «SQB» ва «Asaka bank» 21,4 фоиз, «Poytaxt bank» 21,8 фоиз ҳамда «TBC bank» 21,9 фоиз ставкада автокредит ажратмоқда.

«Turon bank»да ставка 22,2 фоиз, «OFB»да 22,4 фоиз, «Trastbank»да 23,6 фоиз, «Mikrokreditbank» ва «Asia Alliance bank»да 23,9 фоизни ташкил этмоқда.

Юқори сегментда «Davr bank» 24,9 фоиз, «Agrobank» 25,6 фоиз ва «Hamkorbank» 26,9 фоиз ставка таклиф қилмоқда. Бу автокредитлар бўйича келтирилган банклар орасидаги энг юқори кўрсаткичдир.

Эслатиб ўтамиз, аввалроқ сўнгги етти ойда жисмоний ва юридик шахсларга ажратилган кредитлар қолдиғи йил бошидан бери 6,7 фоизга ошиб, 644,6 трлн сўмга етганлиги ҳақида хабар берилганди.

2026-йил 1-январ ҳолатига жисмоний шахсларга ажратилган кредитлар қолдиғи 220,3 трлн сўм бўлган. 1-августга келиб бу кўрсаткич 239,8 трлн сўмга етган ва 8,9 фоизга ошган.

Хусусан, аҳоли кесимида микрокредитлар қолдиғи 15,5 фоизга, ипотека кредитлари 11 фоизга, микроқарзлар қолдиғи эса 4,7 фоизга кўпайган. Автокредитлар қолдиғи эса 40,5 трлн сўмга етган.