Шакира Бишкекка келади. Бу Қирғизистонга қанчага тушиши мумкин?

Дунёга машҳур колумбиялик қўшиқчи Шакира билан Бишкекда чиқиш қилиш бўйича музокаралар олиб борилмоқда. Концерт 2026-йилнинг ноябр ойида «Бишкек Арена»да бўлиб ўтиши кутилмоқда. Бу ҳақда «24.kg» хабар берди.

Президент мулкини бошқариш департаменти маълумотларига кўра, томонлар ҳозирда шартлар бўйича музокаралар олиб бормоқда. Концертнинг аниқ санаси ва бошқа тафсилотлар ҳали маълум эмас.

Шакиранинг Қирғизистондаги концерти давлат миқёсида ташкил этилаётгани сабабли, унинг аниқ гонорари расман очиқланмаган. Бироқ, халқаро шоу-бизнес бозоридаги маълумотларга таянилса, Шакира даражасидаги жаҳон юлдузини олиб келиш камида 5 миллиондан 7,5 миллион долларгача маблағни талаб қилади. Олдинроқ америкалик рэпер Эминем ҳамда хонанда Шакиранинг 2026-йилда Марказий Осиё турнеси доирасида Қозоғистонда концерт бериши мумкинлиги айтилганди. Шакира Қозоғистонга келиш учун ўшанда 7,5 миллион доллар сўраётгани ҳам айтилди. Шундан келиб чиқилса, унинг Бишкекка ташрифи ҳам ана шу суммадан арзон бўлмаслиги аниқ.

Қолаверса, жаҳон юлдузлари учун тонналаб аудио ва визуал жиҳозлар, махсус саҳна декорациялари, ўнлаб кишидан иборат жамоа (раққослар, мусиқачилар, техниклар) учун чартер рейслар ва 5 юлдузли меҳмонхона харажатлари қопланади. Стадион миқёсидаги хавфсизлик чораларини таъминлаш ҳам алоҳида харажат ҳисобланади.

Шунингдек, Қозоғистонда концерт ўтказиладиган майдон камида 50 минг томошабинга мўлжалланган бўлиши керак. «Бишкек Арена» Шакиранинг талабига мос келиши аниқ, у ер 51 минг томошабинга мўлжалланган ва FIFA стандартларига мувофиқ қурилган янги стадион ҳисобланади. Аренанинг биринчи йирик тадбири 31-август куни ўтказилди. У ерда VI Жаҳон кўчманчилар ўйинларининг очилиш маросими бўлиб ўтди.

Ўтган йилнинг август ойида хонанда Женнифер Лопес Тошкентга келганди. «Ўзбекистон 24» телеканалининг хабар беришича, «Миллий» (Бунёдкор) стадионида бўлиб ўтган концертда чипталар нархи 1 миллион сўмдан 4,2 миллион сўмгача фарқ қилган. Шу тариқа концертдан потенциал даромад 25 млрд (1,97 млн доллар) дан 105 млрд сўм (8,28 млн доллар) оралиғида баҳоланди. Маданият ва санъатни ривожлантириш жамғармасининг таъкидлашича, концертни ташкил этиш учун давлат бюджетидан маблағ ажратилмаган. CA Entertainment чипталарни сотиш учун жавобгар бўлган. Концертдан Тошкент шаҳрига 42,5 млрд сўмдан (3,3 млн доллар) ортиқ солиқ тушуми тушган. Концерт хорижий ва маҳаллий сайёҳларни жалб қилиш, шунингдек, меҳмонхона ва ресторан бизнеси учун кучли туртки бўлгани айтилганди. Бироқ солиқ тушумлари ва концертдан тушган даромадлар (авиакомпаниялар, меҳмонхоналар, кафе ва ресторанлар) тақсимоти ошкор этилмади.

Тартибни сақлаш учун 88 та йўл-патрул хизмати ва махсус техника, 8 та тез тиббий ёрдам машинаси, 3800 нафар ҳуқуқ-тартибот идоралари ходими, 300 нафар кўнгилли ва 500 нафар ободонлаштириш ходими иш олиб борганди.