Электроника ишлаб чиқариш бўйича етакчи мамлакатлар қайси?

Жаҳон рақамли техника ишлаб чиқариш қувватларининг қарийб бешдан уч қисми фақат Хитой ҳиссасига тўғри келади. Унинг ишлаб чиқариш экотизими смартфон ва компютерлар, дисплейлар, босма платалар ҳамда бошқа электрон компонентлар ишлаб чиқаришни қамраб олади.

Инфографикада мамлакатларнинг рақамли техника соҳасидаги жаҳон ишлаб чиқариш қувватларидаги улуши, шунингдек, асосий ишлаб чиқариш марказларидаги электроника саноатининг йирик компаниялари кўрсатилган. Визуализация учун маълумотлар «Ember» ташкилоти томонидан тайёрланган бўлиб, 2024–2025-йилларни қамраб олади.

^{Фото: Visual Capitalist}

Хитойнинг улуши 58,8 фоизни ташкил этади — бу иккинчи ўриндаги Тайваннинг 10,2 фоизлик кўрсаткичидан қарийб олти баравар кўп. Хитойнинг ишлаб чиқариш қувватлари рейтингда кўрсатилган қолган барча мамлакатларнинг жами улушидан ҳам юқори.

Хитой янги беш йиллик режа доирасида электроника саноатидаги мавқеини мустаҳкамлашда давом этмоқда. Режада яримўтказгичлар, сунъий интеллект ва бошқа стратегик аҳамиятга эга технологияларни ривожлантириш кўзда тутилган. Интеграл схемалар ишлаб чиқаришнинг бутун занжирига, жумладан, чиплар ишлаб чиқаришга алоҳида эътибор қаратилмоқда. Пекин шу орқали Ғарб технологияларига қарамликни камайтиришга интилмоқда. 2030-йилгача ушбу йўналишлар билан боғлиқ тармоқларнинг умумий операцион даромадини 4,5 триллион долларга етказиш режалаштирилган.

Жаҳон ишлаб чиқариш қувватларининг яна 21,7 фоизи Тайван, Жанубий Корея ва Японияга тўғри келади. Шундай қилиб, тўртта етакчи мамлакатнинг жами улуши 80,5 фоизни ташкил этади. Уларнинг ҳар бири жаҳон технологик таъминот занжирида муҳим ўрин эгаллайди. Тайван яримўтказгичлар ишлаб чиқариш ва электроника йиғиш бўйича энг йирик марказлардан бири ҳисобланади. Жанубий Корея, хусусан, яримўтказгичлар ва дисплейлар ишлаб чиқаришга ихтисослашган. Япония эса узоқ йиллардан буён шаклланган электроника саноатига эга. Биргаликда ушбу иқтисодиётлар яримўтказгичлар, электрон компонентлар ва дисплейлар ишлаб чиқаришдан тортиб, тайёр техника ишлаб чиқаришгача бўлган зич минтақавий ишлаб чиқариш занжирини ташкил этади. Ушбу бозорларда бош қароргоҳи жойлашган йирик компаниялар қаторига TSMC, Foxconn, Samsung, BOE ва Sony киради.

Шарқий Осиёдаги тўртта етакчи мамлакатдан ташқарида бешинчи ўринни Ҳиндистон эгаллайди — унинг жаҳон ишлаб чиқариш қувватларидаги улуши 3,8 фоизни ташкил этади. Ундан бироз ортда қолаётган Ветнамнинг кўрсаткичи 3,6 фоиз. Кейинги ўринда АҚШ — 2,9 фоиз.

Рейтингдан Жануби-Шарқий Осиёнинг бир нечта мамлакатлари ҳам ўрин олган. Таиланд ҳиссасига жаҳон ишлаб чиқариш қувватларининг 1,3 фоизи, Сингапурга 0,7 фоизи, Малайзияга 0,6 фоизи ва Индонезияга 0,3 фоизи тўғри келади. Таққослаш учун, мазкур маълумотлар тўпламида Европанинг энг йирик мамлакати бўлган Германия ҳиссасига атиги 0,7 фоиз тўғри келади.