Энг кўп миллиардерлар қаерда туғилган?
Ню Йорк рўйхатда биринчи ўринни эгалласа, кейинги 3 поғонадан Осиё шаҳарлари ўрин олди. Аҳолиси 40 мингдан кам бўлган Германиядаги шаҳар ҳам дунё мегаполислари билан бир қаторда жой олди.
Дунёда энг кўп миллиардерлар туғилган шаҳар Ню Йорк бўлиб турибди, аммо у улкан бойлик шаклланадиган ягона глобал марказ эмас. Осиё бўйлаб Ҳонгконг, Сингапур ва Мумбай каби шаҳарлар ҳам дунёнинг энг бой инсонлари келиб чиққан асосий марказлар қаторидан жой олади. Бу ҳақда 2026-йилдаги «PlayersTime» таҳлилига ва «Forbes Real-Time» миллиардерлар рўйхатига асосланиб, «Visual Capitalist» хабар берди.
Ушбу харита дунё бўйлаб камида 10 нафар миллиардер туғилган шаҳарларни кўрсатади. Харита 1 680 нафар миллиардер туғилган шаҳарларни қамраб олиб, географик тақсимотдаги қизиқарли минтақавий ва қитъавий тенденцияларни очиб беради.
Ню Йорк: муваффақият бешиги
Ню Йорк шаҳри Ер юзидаги бошқа ҳар қандай шаҳарга қараганда кўпроқ миллиардер яшайдиган жой сифатида машҳур, аммо унинг глобал муваффақият маркази сифатидаги обрўси илк босқичларданоқ шаклланади.
Таҳлил қилинган миллиардерлар орасида 69 нафари Ню Йоркдан чиққан бўлиб, бу дунёдаги ҳар қандай бошқа шаҳардан кўп ва АҚШдаги кейинги бешта шаҳар жами кўрсаткичидан ҳам ортиқдир.
Қуйидаги жадвалда қайси шаҳарларда энг кўп миллиардерлар туғилгани кўрсатилган.
Хитой ва Ҳиндистон мегашаҳарлари кутилган ҳол бўлса-да, Тайван пойтахти Тайпей (11 нафар) ҳам миллиардерлар туғилган жой сифатида яхши намоён бўлган, у намунадаги миллиардерлар сони бўйича Бостон ва Стокголм билан тенг.
«Forbes» рўйхатида еттинчи ўринда турувчи энг бой инсон Женсен Ҳуанг ҳам тайпейлик. У 1963-йилда Тайван пойтахтида туғилган ва 30 ёшида «Nvidia» компаниясига асос солган. Бугунги кунда у бозор капитализацияси бўйича дунёдаги энг йирик компания ҳисобланади. Женсен Ҳуанг ҳозир ҳам компания президенти ва бош ижрочи директори бўлиб, унинг бойлиги 150 миллиард доллардан ошади.
Европадаги ғалати истисно ҳолат
Дунё бўйлаб энг кўп намоён бўлган шаҳарларнинг аксарияти мантиқан йирик иқтисодий марказлардир, масалан, Москва (25) ёки Чикаго (15). Африкада 10 нафардан ортиқ миллиардер туғилган бирорта шаҳар қайд этилмаган бўлса, Жанубий Америкадан ягона мисол сифатида Бразилиянинг собиқ пойтахти Рио де Жанеиро (15) ажралиб туради.
Яна бир кутилмаган шаҳар — Германиянинг жануби-ғарбида жойлашган Ингелҳайм ам Райн (10). Лос Анжелес (13) ёки Истанбул (11) каби йирик мегаполислардан фарқли равишда, Ингелҳайм аҳолиси 40 мингдан кам бўлган кичик шаҳар.
Бу шаҳарда туғилган миллиардерлар сонининг юқорилиги «Boehringer Ingelheim» тарихи билан изоҳланади. У дунёдаги энг йирик хусусий фармацевтика компанияси бўлиб, 1885-йилда айнан шу шаҳарда ташкил этилган ва ҳозиргача шу ерда бош қароргоҳга эга.
Германиянинг энг бой оилаларидан бири ҳисобланган Бёрингерлар оиласининг кўплаб аъзолари айнан шу шаҳарда туғилгани сабабли, Ингелҳайм миллиардерлар туғилган жой сифатида ўз имкониятларидан анча юқори натижа кўрсатган.
