Германияда қуёш панелларининг нархи тушиб, талаб кескин ортди
Арзонлашган ва батареяли мини-қуёш панеллари оммавий равишда балконларга ўрнатилмоқда, бу эса аҳолига электр харажатларини сезиларли қисқартириш имконини бермоқда.
Германияда сўнгги уч йил ичида бир миллиондан ортиқ «шундоқ ўрнатилса ишлайдиган» мини-қуёш тизимлари ўрнатилди. Янги тенденция шундаки, энди бу кичик панеллар кўпгина ҳолларда батарея сақлаш блоклари билан сотилмоқда. Бу электрни кундузи йиғиш ва кейин тунда истеъмол қилишни осонлаштиради. Модуллар икки квадрат метргача бўлиб, битта тизимда тўртта модулгача ўрнатиш мумкин.
Панел ва батарея нархларининг жаҳонда кескин арзонлаши бу технологияни оддий хонадонлар учун ҳам мақбул қила бошлади. Кичкина тизимлар тахминан 200 евродан бошланса, тўрт модулли ва батареяли тўлиқ комплектация 1000 евродан камроқ турмоқда. Германияда шундай панеллар орқали ишлаб чиқарилган электрнинг ҳақиқий қиймати kWh учун 7–15 евроцентни ташкил этади — бу ўртача таъминот корхонасининг 40 евроцентлик нархидан анча арзон.
Мини тизимлар 4–7 йилда ўз-ўзини қоплайди, шундан кейин ишлаб чиқарилган электр мутлақо бепул бўлиб қолади. Тажрибалар шуни кўрсатадики, тўрт модулли ва батареяли тизим икки кишилик хонадоннинг ярим электр эҳтиёжини қоплашга қодир.
Қизиғи шундаки, дунёда Германиядан анча қуёшли жойлар бўлишига қарамай, айнан шу мамлакат мини-қуёш панеллари сотувида етакчи. Сабаблар бир нечта: нархларнинг тушгани, технология такомиллашиши ва сиёсий рағбатлар. 2023 йилдан бери хусусий қуёш тизимлари солиқдан озод қилинди, 2024 йилдан эса балконларга панел ўрнатиш учун рухсат ёки электр корхонаси текшируви талаб этилмайди.
Мутахассислар хариддан олдин маслаҳат олишни муҳим деб ҳисоблайди. Модуллар учун қуёш бурчаги, модул сони, истеъмол даражаси ва электр нархи — ҳаммаси иқтисодий самарадорликка таъсир қилади. Бундан ташқари, сифатли ва сертификатланган қурилмаларни танлаш тавсия этилади.
