Bitcoin кескин тушишдан кейин 80,4 минг доллар атрофида барқарорлашди: ФРТ қарори кутилмоқда

25-октябр куни Bitcoin нархи 80 минг 400 доллар атрофида бўлди. Дам олиш кунларида криптовалюта бозорида кескин сотувлар кузатилганидан кейин нарх бироз барқарорлашди. Айни пайтда инвесторлар криптовалюта бозоридаги йирик йўқотишларни баҳоламоқда ва АҚШ Федерал захира тизимининг (ФРТ) фоиз ставкалари бўйича навбатдаги қарорини кутмоқда.

Кутилишича, 27–28-октябр кунлари бўлиб ўтадиган ФРТ йиғилиши Bitcoin нархига жиддий таъсир кўрсатиши мумкин. Трейдерлар регуляторлар фоиз ставкаларини ўзгаришсиз қолдирадими ёки яна оширадими, деган саволга жавоб изламоқда.

Фоиз ставкаларининг оширилиши доллар қийматини мустаҳкамлаб, хавфи юқорироқ бўлган активларга, жумладан, Bitcoin’га бўлган талабни камайтириши мумкин. Аксинча, ФРТ фоиз ставкалари бўйича юмшоқроқ сиёсат юритишини билдирса, Bitcoin нархининг тикланишига ёрдам бериши мумкин.

Нефт нархининг кўтарилиши эса вазиятни янада мураккаблаштирмоқда. Эрондаги уруш фонида Brent нефти нархи 117 доллардан юқори савдоланмоқда. Бу инфляция юқори даражада сақланиб қолиши мумкинлиги ҳақидаги хавотирларни кучайтирмоқда.

24-октябр куни Bitcoin нархи 79 минг 146 долларгача тушди. Бу унинг бир ойдан ортиқ вақт давомидаги энг паст кўрсаткичи бўлди. Кейинчалик нарх яна 80 минг долларлик муҳим чегарадан юқорига кўтарилди. 25-октябр куни Тошкент вақти билан 17:31 ҳолатига кўра, Bitcoin 80 минг 352 доллардан савдоланган.

Bitcoin кетма-кет тўртинчи кун ҳам нарх пасайиши билан якунлаши мумкин. Шунингдек, у июн ойидан бери биринчи марта бир ойлик пасайишни қайд этиш арафасида турибди.

«Coinglass» маълумотларига кўра, сўнгги 24 соат ичида криптовалюта бозорида 810 миллион доллардан ортиқ позициялар мажбуран ёпилган. Шундан тахминан 689 миллион доллари нарх кўтарилишини кутган трейдерларнинг позицияларига тўғри келади.

Дам олиш кунларида бозорда савдо фаоллиги паст бўлгани сотув босимини кучайтирди. Bitcoin нархи 80 минг доллардан пастга тушгач, қарз маблағлари ҳисобидан савдо қилган кўплаб трейдерларнинг позициялари мажбуран ёпилди.

Bitcoin нархи 50 кунлик ўртача кўрсаткичдан ҳам пастга тушди. Ушбу кўрсаткич тахминан 81 минг 700 долларни ташкил этмоқда. Трейдерлар энди нарх 78 минг 400 ва 77 минг 876 доллар даражаларида қўллаб-қувватланиш топиши мумкинлигини кузатмоқда. Бу даражалар нархнинг янада пасайишини секинлаштириши мумкин бўлган чегаралар ҳисобланади.

Айни пайтда Bitcoin’ни захира сифатида сақлайдиган компаниялар ҳам молиявий қийинчиликларга дуч келмоқда. Улар криптовалюта харидларини компаниянинг бошқа молиявий мажбуриятлари билан мувозанатлаштиришга ҳаракат қилмоқда.

«Fidelity Digital Assets» маълумотларига кўра, муддатсиз имтиёзли акцияларни чиқариш орқали 2025-йилдан буён тахминан 136 мингта Bitcoin харид қилиниши молиялаштирилган.

«Strategy» (NASDAQ) ва «Strive» (NASDAQ) каби компаниялар капитал жалб қилиш учун имтиёзли акциялар чиқаришдан тобора кўпроқ фойдаланмоқда. Бироқ бу акциялар бўйича мунтазам дивиденд тўловлари компанияларнинг келгусида Bitcoin харид қилиш учун ишлатиши мумкин бўлган маблағларини чеклаши эҳтимолдан холи эмас.

Масалан, «Strategy» яқинда имтиёзли акцияларни қайтариб сотиб олиш учун 193 миллион доллар сарфлади. Бу жараёнда эса атиги 267 та Bitcoin харид қилди. Бу компания маблағларидан бир вақтнинг ўзида турли мақсадларда фойдаланиш зарурати борлигини кўрсатади.

Бундан ташқари, «Xapo Bank» бош директори Шеймус Рокканинг айтишича, катта миқдорда Bitcoin сақлайдиган бой инвесторлар криптовалюталарини сотиш ўрнига, уларни гаровга қўйиб қарз олиш ва ўз активларидан даромад олишга тобора кўпроқ қизиқмоқда.

Рокканинг таъкидлашича, йирик институционал инвесторларнинг бозорга кириб келиши узоқ муддатда Bitcoin’га бўлган талабни қўллаб-қувватлаши мумкин. Бироқ қонунчилик билан боғлиқ ноаниқликлар ва геосиёсий вазият ҳали ҳам бозор ривожига тўсқинлик қилмоқда.

Яна бир муҳим воқеа — аппарат криптоҳамёнларини ишлаб чиқарувчи «Keystone» компанияси мижозлар маълумотлари сизиб чиққанини маълум қилди. Маълумотлар орасида мижозларнинг исмлари, алоқа маълумотлари, етказиб бериш манзиллари ва харидлар ҳақидаги маълумотлар бор.

Компания шахсий калитлар, ҳамённи тиклаш иборалари ва тўлов маълумотлари ошкор бўлмаганини билдирди. Шунга қарамай, мижозлар сохта пул қайтариш таклифлари ва алмаштириб бериш баҳонасида юбориладиган фирибгарлик хабарларидан эҳтиёт бўлиши кераклиги ҳақида огоҳлантирилди.

Бугунги криптовалюта нархлари: алткоинлар турлича ҳаракатланмоқда

25-октябр куни криптовалюта бозорида нархлар турлича ўзгарди: айрим криптовалюталар қимматлашди, бошқалари эса арзонлашди.

Дунёдаги энг йирик криптовалюталардан иккинчиси бўлган «Ether» нархи 0,49 фоизга пасайиб, 2 331,61 долларни ташкил этди.

Бозор қиймати бўйича учинчи ўриндаги XRP эса 1,54 фоизга қимматлашиб, 1,2930 долларга етди.

«Solana» нархи 0,34 фоизга ўсиб, 100 минг 721 долларни ташкил қилди. BNB эса 1,49 фоизга кўтарилиб, 737,80 долларга етди.

«Cardano» нархи 0,85 фоизга пасайиб, 0,2032 долларни ташкил этди. «Dogecoin» эса 0,57 фоизга қимматлашди.

Мемкоинлар орасида «TRUMP» нархи 1,12 фоизга ошди. «Shiba Inu» нархи эса ўзгаришсиз қолди.