Ҳафта охирида Ўзбекистонда об-ҳаво сезиларли даражада салқинлашади
Ҳафтанинг охирига бориб ҳаво ҳарорати пасайиши кутилмоқда. Аммо бугун ва эртага республика бўйлаб жуда юқори ҳарорат сақланиб туради. Бу ҳақда «Ўзгидромет» маркази хабар берди.
25–26 июл кунлари кундузги ҳарорат Ўзбекистоннинг кўпгина ҳудудларида +38...+40 даража, республика жанубида эса +41...+43 даражагача етиши кутилмоқда. Ёғингарчилик кутилмайди.
27 июл, якшанба кунидан эътиборан республикада ҳаво сезиларли даражада салқинлашади. Кундузги ҳарорат +34...+37 даража, жанубий ҳудудларда эса +38...+39 даражагача пасайиши тахмин қилинмоқда.
Шу билан бирга, айрим жойларда шамол 13–18 m/s тезликкача кучайиши, чанг-тўзонлар кузатилиши мумкин. Бу эса айрим йўлларда кўриш имкониятини пасайтиради.
Тошкент шаҳрида ҳам шанбагача об-ҳаво анча иссиқ бўлиб, 25–26 июл кунлари кундузги ҳарорат +38...+40 даража атрофида бўлади. Якшанба куни эса +35...+37 даражагача пасайиши кутилмоқда. Кечалари пойтахтда +22...+25 даража илиқ ҳаво бўлади.
