Идлибда қуролли тўқнашув: Сурия хавфсизлик кучлари ўзбекистонликларни қўлга олди

Сурия кучлари мамлакат шимоли-ғарбидаги хавфсизлик амалиёти давомида ўзбекистонликларни ҳибсга олди. Бу ҳақда Сурия хавфсизлик хизматининг икки расмийларига таяниб «Reuters» нашри хабар берди.

Қайд этилишича, бу ҳибслар улардан бирининг иштирокидаги низо ҳукумат хавфсизлик биноси олдидаги норозилик намойишларига айланиб кетганидан сўнг юз берган.

Расмийлар ва маҳаллий аҳолининг сўзларига кўра, кескинлик Идлиб шаҳрида ўт очишда айбланган ўзбекистонликни ҳокимият органлари қўлга олмоқчи бўлганидан кейин бошланган. Шундан сўнг қуролланган бошқа ўзбекистонликлар унинг озод этилишини талаб қилиб намойиш уюштирган.

Нашрнинг таъкидлашича, ҳукумат 2011 йилдаги фуқаролар урушидан кейин бу ерга жанг қилиш учун келган хорижликлар устидан давлат назоратини ўрнатишга уринмоқда. Уларнинг кўпчилиги 2016 йилда «Ал-Қоида» билан алоқаларни узган президент Аҳмад аш-Шараа етакчилигидаги гуруҳ таркибида ёки у билан бирга жанг қилган.

Маълум қилинишича, хавфсизлик кучлари Идлиб яқинидаги бир қанча ҳудудларда, жумладан, Кафрия ва ал-Фуа шаҳарларида намойишда қатнашган ўзбекистонликларни нишонга олган ҳолда ҳибсга олиш ишларини олиб борган. Бу шаҳарлар атрофида ҳарбий кучлар жойлаштирилган. Ҳозирча қанча ўзбекистонлик ҳибсга олингани аниқ эмас.

Ўтган йилги маълумотларга кўра, Сурияда 1500 га яқин ўзбекистонлик бор, уларнинг баъзилари оилалари билан бирга.