IMEI дастидан огоҳлантирилган тадбиркорлар, ўзгараётган картадан картага пул ўтказиш тартиби ва халқаро адвокатлар эътирози — 2-апрел дайжести

IMEI кодлари бўйича тадбиркорлар огоҳлантирилди

Рақобат қўмитаси мобил қурилмаларнинг IMEI кодлари рўйхатдан ўтказилмаслиги билан боғлиқ ҳолатларни ўрганиб, тадбиркорларни огоҳлантирди. 2025 йилда ушбу масала бўйича 147 та мурожаат келиб тушган бўлиб, уларнинг 55 таси ижобий ҳал этилган, 89 тасига тушунтириш берилган, 3 таси ваколатли органларга юборилган. Қонунга кўра, маҳсулот кафолат муддатида нормал ишлаши таъминланиши шарт.

Вазирлар Маҳкамасининг қарорига мувофиқ, IMEI кодларини рўйхатдан ўтказиш мажбурияти ишлаб чиқарувчи, импорт қилувчи ёки сотувчи зиммасига юклатилган. Бу вазифани истеъмолчига юклаш мумкин эмас, шунингдек қўшимча хизматларни мажбурий тарзда талаб қилишга йўл қўйилмайди. Қўмита талабларга амал қилмаган тадбиркорларга нисбатан тегишли чоралар кўрилишини маълум қилди.

Халқаро адвокатлар Ўзбекистонда инвесторларга босим ўтказилаётганини иддао қилишмоқда

Халқаро «Amsterdam & Partners LLP» юридик фирмаси Ўзбекистон ҳукумати ва Ўзбекистон Миллий банки ҳаракатларини танқид қилиб, «SOLFY Uzbekistan» директори Ўктам Ҳасановнинг ҳибсга олинишини инвесторга босим сифатида баҳолади. Баёнотда айтилишича, ҳибс банк билан музокаралар давом этаётган пайтда амалга оширилган ва бу инвестордан қўшимча имтиёзлар талаб қилишга қаратилган бўлиши мумкин. Шунингдек, бу ҳолат инвесторларни ҳимоя қилиш тамойилларига зид экани таъкидланган.

Юристлар Ҳасановга қўйилган айбловларни асоссиз деб ҳисоблаб, вазият Ўзбекистоннинг инвестиция муҳитига салбий таъсир кўрсатиши мумкинлигини билдирган. «SOLFY» ва унинг раҳбарияти ўз ҳуқуқларини халқаро арбитраж орқали ҳимоя қилиш ниятида эканини маълум қилган. Низонинг халқаро даражага чиқиши мамлакатнинг инвестициявий жозибадорлиги ва халқаро рейтингларига таъсир қилиши мумкинлиги қайд этилган.

Ўзбекистонда банк картасини мобил иловага бириктириш ва пул ўтказиш тартиби ўзгаради

Ўзбекистонда 2026-йил 22-апрелдан банк карталарини мобил иловаларга бириктириш ва пул ўтказиш тартиби ўзгаради. Янги талабга кўра, мобил иловага уланган телефон рақами фойдаланувчининг ўзи номида бўлиши шарт, акс ҳолда рўйхатдан ўтиш ва карта бириктириш рад этилади. Рўйхатдан ўтиш жараёнида логин-парол, ОТП-код ва биометрик идентификация (юзни сканерлаш) талаб қилинади, тасдиқлаш кодлари эса камида 6 белгидан иборат бўлиб, 59 сония амал қилади.

Шунингдек, бошқа қурилмадан кирилганда барча карталар автоматик чиқарилади ва фақат шахснинг ўзига тегишли ҳисоблар билан операция қилишга рухсат берилади. Веб-сайтлар орқали P2P ўтказмалар тўхтатилиб, барча операциялар фақат мобил иловалар орқали амалга оширилади. Қўшимча равишда, банклар «liveness detection» технологиясини жорий этиб, биометрик текширув орқали фирибгарлик хавфини камайтириши белгиланган.

Ўзбекистон IT бозорида етакчи давлатлар рўйхати эълон қилинди

2026-йил 1 март ҳолатига кўра, Ўзбекистонда IT ва алоқа соҳасида 1 242 та хорижий корхона фаолият юритмоқда. Улар орасида Россия 457 та компания билан етакчиликни сақлаб қолган, Қозоғистон 113 та, Беларусь 63 та, АҚШ 58 та ва Туркия 51 та корхона билан кейинги ўринларни эгаллаган.

Шунингдек, Хитой (40 та), БАА (32 та), Япония (30 та), Тожикистон (29 та) ва Жанубий Корея (28 та) компаниялари ҳам бозорда фаол иштирок этмоқда, бошқа давлатлар ҳиссасига эса 341 та корхона тўғри келади. Бу ҳолат Ўзбекистон IT бозорининг географияси кенгайиб, турли мамлакатлардан инвесторлар жалб этилаётганини кўрсатади.

Ўзбекистон ЕОТБнинг учинчи йирик акциядорига айланади

Ўзбекистон Евроосиё тараққиёт банкига аъзо бўлиб, ҳозирча 0,66 фоизлик улушга эга бўлди. 2025-йил якунига кўра, мамлакат банк капиталига 10 млн доллар киритган, умумий обуна ҳажми эса 777,8 млн долларни ташкил этади. Янги акциядорнинг қўшилиши натижасида банкдаги кучлар мувозанати ўзгариб, Россия ва Қозоғистон улушлари бироз қисқарган.

Мажбуриятлар тўлиқ бажарилгандан сўнг Ўзбекистоннинг улуши 10 фоизга етиши ва Россия ҳамда Қозоғистондан кейинги учинчи йирик акциядорга айланиши кутилмоқда. Бу мамлакатга банкнинг инвестиция сиёсатига таъсир қилиш ва йирик минтақавий инфратузилма лойиҳаларини молиялаштиришда кенг имкониятлар яратади.