Луврдаги ўғрилик бўйича Францияда яна беш киши қўлга олинди
Париждаги Лувр музейидан Наполеон даврига оид 88 млн еврога баҳоланган қимматбаҳо зеб-зийнатларни ўғирлаш иши бўйича яна беш киши ҳибсга олинди.
Францияда Лувр музейида содир этилган йирик ўғирлик иши бўйича яна беш нафар шахс қўлга олинди. Бу ҳақда RTL телеканали Париж прокуратурасига таяниб хабар берди. Тергов маълумотларига кўра, янги ҳибслар 29 октябр куни Парижда амалга оширилган.
BFMTV телеканали маълумотига кўра, ушланганлардан бири Луврдаги ўғирликда бевосита иштирок этган тўрт шахсдан бири бўлиши мумкин. Париж прокурори Лора Бекконинг таъкидлашича, ҳуқуқни муҳофаза қилувчи органлар бу шахснинг жиноятга бевосита алоқадорлигини тасдиқловчи «ДНК далиллари»га эга. Қолган гумонланувчилар эса воқеа ҳақида маълумотга эга бўлиши эҳтимол қилинмоқда.
Луврдан ўғирланган қимматбаҳо ашёлар орасида император хоним Евгения (Наполеон III хотини), қиролича Мария-Амелия ва қиролича Гортензияга тегишли зеб-зийнатлар бор эди. Музейнинг баҳолашича, жами ўғирланган буюмлар қиймати 88 млн еврони ташкил этади.
Терговчиларнинг фикрича, ўғирланган тангалар ва тошлар эҳтимолан ажратиб олинган ёки қимматбаҳо металллар қайта эритилган бўлиши мумкин. Париж прокурори Лора Бекко қимматбаҳо буюмлар кимнинг қўлида бўлса, уларни ихтиёрий равишда қайтаришга чақирди. Унга кўра, бундай ҳолатда судлар «ўғирлик ортидан келган зарар етказилмаганини» ҳисобга олади.
25 октябр куни ҳибсга олинган икки гумонланувчи 29 октябрда расман қамоққа жўнатилган. Улар «ўз иштирокини қисман тан олгани»ни билдирилган. Ҳозирча Наполеон даврига оид ўғирланган зеб-зийнатлар топилмаган.
