Марказий Осиё республикаларига қарши «Жексон-Веник» тузатмаси тез орада бекор қилинади
Трамп иштирокидаги саммитда Жексон–Веник тўсиғини бекор қилиш масаласи кўтарилди. Сенатор Жим Риш бу қарор “жуда яқин орада” қабул қилинишини билдирди.
Вашингтондаги С5+1 музокаралари чоғида АҚШ президенти Доналд Трамп журналистларга қисқача вақт ажратган. Журналист Азиза Қурбонова Ўзбекистон ва АҚШ ўртасидаги савдони чекловчи Жексон–Веник тузатмаси қачон бекор қилиниши ҳақида Доналд Трампга савол берган.
Президент Доналд Трамп жавоб бериш ваколатини музокарада иштирок этаётган сенатор Жим Ришга йўналтирди. Сенатор мазкур масала юзасидан шундай деди:
«Жексон–Веник тузатмасини бекор қилиш вақти аллақачон келган. Президентнинг ёрдами ва ҳамкорлигида бу қарорни жуда яқин орада бекор қиламиз. Катта раҳмат».
Маълумот учун: АҚШнинг «Савдо тўғрисида»ги қонунига 1974 йилги Жексон-Веник тузатмаси айрим давлатларнинг эмиграцияга қўйган чекловлари, хусусан, СССРни тарк этмоқчи бўлган яҳудийларга нисбатан чекловлар туфайли АҚШ билан нормал савдо қилиш ҳуқуқидан маҳрум этиш мақсадида қабул қилинган.
Гарчи совет иттифоқи 1991 йилда парчаланиб кетган бўлса-да, Жексон-Веник тузатмаси унинг айрим собиқ аъзолари учун амал қилишда давом этиб келмоқда. 2000–2012 йилларда бу чекловдан Қирғизистон, Гуржистон, Украина, Арманистон, Молдова ва Россия чиқариб ташланган.
Бироқ, Марказий Осиёнинг тўрт давлатидан чеклов ҳануз олиб ташланмаган.
Ҳозирда Жексон–Веник тузатмаси савдо алоқаларига тўғридан тўғри таъсир кўрсатмаётган бўлса-да, у техник тўсиқ бўлиб қолмоқда. Масалан, ҳар йили АҚШ Конгресси ушбу мамлакатларга савдо имтиёзлари бериш масаласини қайта кўриб чиқишига тўғри келади. Бу эса савдо шартномаларини тасдиқлашда бюрократик кечикишларга сабаб бўлади.
