Messida rekordlar, Ronalduda antirekordlar: Superyulduzlar jahon chempionatini qanday boshladi?

Krishtianu Ronaldu

Shimoliy Amerikada o‘tayotgan jahon chempionati guruh bosqichining dastlabki o‘yinida Portugaliya terma jamoasi Kongo DR bilan durang o‘ynadi (1:1). Krishtianu Ronaldu esa ushbu bahsda ikkita antirekord o‘rnatdi.

Portugaliyalik yulduz yirik turnirlardagi golsiz seriyasini ketma-ket 10 ta o‘yingacha uzaytirdi. Ronaldu so‘nggi bor bunday darajadagi musobaqalarda 2022 yilning 24-noyabrida, Qatardagi JCH doirasida Ganaga qarshi kechgan bahsda (3:2) penaltidan gol urgan edi. O‘shandan beri hujumchi jahon va Yevropa chempionatlarida jami 10 ta uchrashuv o‘tkazib, birorta ham to‘p kirita olmadi.

Bundan tashqari, Ronaldu o‘yin davomida to‘pga bor-yo‘g‘i 25-marta teginish qildi. Bu hujumchi uchun yirik xalqaro turnirlardagi eng yomon ko‘rsatkich bo‘ldi (faqat to‘liq harakat qilgan o‘yinlari hisobga olinganda).

Harri Keyn

Angliya terma jamoasi jahon chempionatidagi ishtirokini g‘alaba bilan boshladi va bunda jamoa sardori Harri Keynning xizmati katta bo‘ldi. Uchrashuv 4:2 hisobida yakunlanib, raqib darvozasiga kiritilgan gollarning ikkitasiga aynan Keyn mualliflik qildi.

Inglizlar sardori gollardan birini 11 metrlik jarima nuqtasidan kiritdi. Bu uning mundiallar tarixida penaltidan urgan beshinchi goli bo‘ldi. Shu tariqa, Keyn mazkur ko‘rsatkich bo‘yicha mutlaq rekordchiga aylandi (o‘yindan keyingi penaltilar seriyasi hisobga olinmaganda).

Bundan tashqari, o‘yinning so‘nggi soniyalarida (90+5-daqiqada) Keyn to‘pga tanasi bilan to‘g‘anoq bo‘lib, jamoasini muqarrar goldan qutqarib qoldi.

Lionel Messi

Lionel Messi joriy mundialni biryo‘la bir nechta tarixiy rekordlarni yangilash bilan boshladi. Jazoir terma jamoasiga qarshi kechgan o‘yinda Argentina sardori xet-trik qayd etib, jamoasining 3:0 hisobidagi yirik g‘alabasini ta’minladi.

Jazoirliklar darvozasiga yo‘llangan bu uchta gol evaziga Messi jahon chempionatlaridagi umumiy gollari sonini 16 taga yetkazib oldi. Natijada u shu paytgacha turnir tarixidagi eng yaxshi to‘purarlar ro‘yxatini yakka o‘zi boshqarib kelayotgan Miroslav Kloze bilan tenglashdi.

Shu bilan birga, Messi mundiallar tarixida xet-trik qayd etgan eng yoshi katta futbolchiga aylandi: o‘yin kuni u 38 yoshu 357 kunlik edi. Bu boradagi avvalgi rekord 2018 yilda 33 yoshu 130 kunligida ispanlar darvozasiga uchta to‘p kiritgan Krishtianu Ronalduga tegishli edi. Shuningdek, argentinalik afsona jarima maydonchasi tashqarisidan gol urish bo‘yicha braziliyalik Rivelino bilan tenglashib oldi (har ikkisida 5 tadan gol). Bundan tashqari, Messi tarixda oltita jahon chempionatida maydonga tushgan ilk futbolchi bo‘ldi. Krishtianu Ronaldu esa bu natijani 17-iyun kuni Kongo DRga qarshi o‘yinda takrorladi.

Yana bir ahamiyatli jihati shuki, argentinalik hujumchi jahon chempionatlaridagi o‘yinlar soni bo‘yicha ham o‘z rekordini yangiladi — endi uning hisobida 27 ta uchrashuv bor. Faoliyatini davom ettirayotgan futbolchilar orasida bu ko‘rsatkichga eng yaqin turgan o‘yinchi — bu Ronaldu (22 ta o‘yin).

Lamin Yamal

Ispaniya terma jamoasi hujumchisi Lamin Yamal jahon chempionatlaridagi debyutini o‘tkazdi. U Kabo-Verdega qarshi kechgan uchrashuvning (0:0) 71-daqiqasida Gavi o‘rniga zaxiradan o‘yinga qo‘shildi. E’tiborlisi, shifokorlar uning son mushaklaridagi jarohati qaytalanishi xavfi yuqori ekanidan ogohlantirganiga qaramay, yosh iqtidor baribir maydonga tushdi.

Yamal o‘ziga berilgan 20 daqiqa davomida o‘ng qanotda bir nechta himoyachini ortda qoldirib, yuksak texnikasini namoyish etdi. Uning jarima maydonchasi ichiga oshirgan xavfli uzatmasi gol bilan yakunlanmagan bo‘lsa-da, 18 yoshli vinger hujumda doimiy ravishda keskinlik yaratib turdi. Biroq Ispaniya baribir bu vaziyatlarni golga aylantira olmadi.

Kilian Mbappe

Kilian Mbappe joriy yilda faoliyatidagi uchinchi jahon chempionatida ishtirok etmoqda. Hujumchi Senegalga qarshi kechgan dastlabki bahsda dubl qayd etib, Fransiya terma jamoasining 3:1 hisobidagi ishonchli g‘alabasiga ulkan hissa qo‘shdi.

Ushbu ikki gol evaziga Mbappe Fransiya milliy terma jamoasi tarixidagi eng yaxshi to‘purarlar ro‘yxatida birinchi o‘ringa ko‘tarilib oldi. Shuningdek, u mundiallardagi umumiy sermahsullik rekordiga ham yaqinlashdi va amaldagi eng yaxshi ko‘rsatkichdan bor-yo‘g‘i ikkita golga ortda qolmoqda.

Erling Xoland

Norvegiyalik to‘purar Erling Xoland uchun bu galgi jahon chempionati debyut musobaqaga aylandi. Norvegiya turnirni Iroq terma jamoasi ustidan 4:1 hisobidagi g‘alaba bilan boshladi. Xoland 29 va 43-daqiqalarda raqib darvozasini ishg‘ol qilib, dubl qayd etdi va aynan uning kiritgan to‘pi uchrashuv taqdirini hal qiluvchi g‘alaba goliga aylandi.

Xoland jahon chempionatidagi debyut o‘yinidayoq ikkita gol urgan tarixdagi birinchi norvegiyalik futbolchiga aylandi. Mundialdagi faoliyatning bunday yorqin boshlanishi sanoqli o‘yinchilargagina nasib qilgan.

Yana bir qiziqarli jihati shundaki, ushbu turnirda Xoland o‘z futbolkasiga ota-onasining qo‘shaloq familiyasi — «Breut-Xoland» yozuvini tushirgan holda maydonda harakat qilmoqda.