Мирзиёев Путинни табриклади
Икки давлат етакчиси телефон орқали мулоқот қилди.
Ўзбекистон Президенти Шавкат Мирзиёев 7 октябрь куни Россия Президенти Владимир Путин билан телефон орқали мулоқот қилди.
Ўзбекистон раҳбари Россия етакчисини таваллуд куни билан самимий табриклаб, унга мустаҳкам соғлиқ, бахт-саодат ва муваффақиятлар, дўст Россия халқига эса равнақ тилади.
Владимир Путиннинг замонавий Россияни барпо этишдаги тарихий роли ҳамда Ўзбекистон – Россия кенг қамровли стратегик шериклик ва иттифоқчилик муносабатларини мустаҳкамлашга қўшаётган шахсий ҳиссаси қайд этилди.
Ўзаро ҳамкорлик барча йўналишларида жадал ривожланаётгани мамнуният билан таъкидланди. Ўзаро савдо ҳажми, саноат, энергетика ва бошқа устувор йўналишларда етакчи корхоналар кооперацияси кўлами изчил ортиб бормоқда.
Куни кеча Фарғона шаҳрида бўлиб ўтган Ҳукуматлараро комиссиянинг навбатдаги йиғилиши ҳамда Ҳудудлар кенгашининг учинчи йиғилиши натижалари юқори баҳоланди.
Мулоқотда фаол маданий-гуманитар алмашинувлар давом этаётганига ҳам эътибор қаратилди. Хусусан, яқинда Ўзбекистонда «Санъатлар олами» деб номланган Россия санъати фестивали муваффақиятли ўтказилгани, айни кунларда эса Москва шаҳрида Ўзбекистон маданияти кунлари бўлиб ўтаётгани алоҳида таъкидланди.
Суҳбат якунида томонлар халқаро ва минтақавий аҳамиятга молик долзарб масалалар юзасидан фикр алмашиб, бўлажак тадбирлар режасини муҳокама қилдилар.
Маълумот учун, Владимир Путин туғилган кунларини турлича ўтказган. 2014 йилда 62 ёшини Сибир тайгасида, энг яқин аҳоли пунктидан 300–400 километр узоқликда нишонлаган. Кремль буни Путиннинг 15 йил ичидаги биринчи расмий дам олиш куни сифатида билдирган.
2015 йилда эса у 63 ёшини Сочида муз устида хоккей ўйнаб нишонлаган. Путин иштирок этган жамоа 15:10 ҳисобида ғалаба қозонган ва президентнинг ўзи етти гол урган. Унинг жамоасида собиқ НХЛ юлдузлари ҳам иштирок этган.
2023 йилда Путиннинг 71 ёшга тўлиши Ўзбекистон ва Қозоғистон президентлари Шавкат Мирзиёев ва Қосим-Жомарт Тоқаев билан бирга ўтган. Путиннинг ўзи кейинчалик туғилган кунини учовлон ўтказганини айтган.
2024 йилда эса Путин 72 ёшини иш жараёнида кутиб олган ва туғилган куни муносабати билан Россия ҳамда хориждан бир қатор табриклар қабул қилган.
