НАТО Бош котиби: «Биз Россиянинг кейинги нишонимиз»
Унга кўра, Россиядан келаётган хавф кескин ортиб борамоқда ва алянс бугун ҳақиқий таҳдид остида турибди.
НАТО бош котиби Марк Рютте алянснинг Россия учун навбатдаги нишонга айланишини таъкидлади. У бу ҳақда Берлинда Германия канцлери Фридрих Мерц билан ўтказилган қўшма матбуот анжуманида маълум қилди.
«Бугун мен сизларга НАТО позицияси ва уруш бошланишидан олдин унинг олдини олиш учун нима қилишимиз кераклиги ҳақида гапириб бериш учун бу ердаман. Бунинг учун биз таҳдидни жуда аниқ тушунишимиз лозим: биз Россиянинг кейинги нишонимиз ва аллақачон хавф остидамиз», - деб айтди Рютте. Унинг сўзлариндан The Guardian иқтибос келтирмоқда.
НАТО бош котиби жуда кўпчилик вазиятнинг жиддийлиги ва шошилинчлигини ҳис қилмаётгани, ҳамда «вақт биз томонда деб ўйлаётганини» таъкидлади.
«Аслида ундай эмас. Ҳаракат қилиш вақти келди. Иттифоқчиларнинг мудофаа ва ишлаб чиқариш харажатлари тез суръатда ўсиши керак. Қуролли кучларимиз хавфсизлигимизни таъминлаш учун барча зарур нарсаларга эга бўлиши шарт», - дея қўшимча қилди у.
Рюттенинг фикрича, Россия «НАТО ва Украинага нисбатан янада қўполроқ, бепарвороқ ва шафқатсизроқ бўлиб қолган».
«XXI асрда можаролар масофадан туриб эмас, балки эшигимиз олдида олиб борилади», дея таъкидлаган НАТО бош котиби.
Рюттенинг сўзларига кўра, воқеаларнинг бундай ривожланишини НАТО мамлакатларининг бирдамлиги, қатъияти ҳамда мудофаага сармоя киритиш орқали олдини олиш мумкин.
«Бу даҳшатли фикр, лекин агар биз ўз мажбуриятларимизни бажарсак, бундай сценарийнинг олдини олишимиз мумкин. Мен сизларга, агар тезроқ ҳаракат қилмасак, бизни нима кутаётганини айтишга мажбурман», - деди у.
Рютте Берлиндаги чиқиши давомида Нидерландиянинг собиқ бош вазири сифатида Россия президенти Владимир Путин билан ўтказган музокаралари ҳақида ҳам сўзлади:
«Мен Путин билан кўп марта телефон орқали гаплашдим, кейинчалик у билан G20 йиғилишларида учрашдим... ва мен аллақачон унинг фикри-хаёлларини тахмин қилишни тўхтатиб, фақат фактларга эътибор берадиган бўлдим», - деди у.
