Ўзбекистонда олтин экспорти кескин тўхтади, аммо захиралар рекорд даражага етди
Олтин сотуви октябрда деярли амалга оширилмаган, аммо экспорт 10 ойда рекорд даражада ўсди.
2025 йилнинг январь–октябрь ойлари оралиғида Ўзбекистоннинг олтин экспорти 9,9 млрд долларга етди — бу ўтган йилга нисбатан 49,4 фоизга кўп. Миллий статистика қўмитаси маълумотларига кўра, мамлакат олтин сотиш бўйича тарихий кўрсаткичларни янгилаган бўлса-да, октябрь ойида экспорт деярли тўхтаган — жами 300 минг долларлик олтин хорижга чиқарилган. Бундан аввал ҳам йил бошидан бери икки ой — январ ва июнда МБ олтин сотмаган эди.
Қолган ойларда эса экспорт фаол бўлиб, айниқса февралдан апрелгача ҳар ой 1,7–1,9 млрд долларлик олтин сотилган. Сентябрь ойида ҳам 1,47 млрд долларлик экспорт қайд этилган. Ушбу рақамлар орқали мамлакат 2023 йилдаги 8,15 млрд долларлик олтин экспорти рекордини анча ортда қолдирди.
Жаҳон олтин кенгаши маълумотларига кўра, сентябр ойида Ўзбекистон дунёда олтин сотган ягона мамлакат бўлган. Марказий банк фақат шу ойнинг ўзида 4 тонна олтин сотган. Умуман, йил бошидан бери сотилган миқдор 21 тоннага етган — бу жаҳон бўйича энг юқори кўрсаткич саналади.
Бошқа томондан, олтин захиралари ҳажми ва қиймати эса янги босқичга чиққан. Октябрда мамлакатнинг умумий захиралари 59,33 млрд долларга етди, шундан 47,85 млрд доллари олтин хазинасининг қийматини ташкил этади. Бу кўрсаткичлар асосан олтин нархи ошиши ва физик ҳажмнинг 370 тоннагача кўпайиши ҳисобига юзага келди.
Бу орада Навоий кон-металлургия комбинати ҳам олтин ишлаб чиқариш ва экспортда фаол қатнашмоқда. НКМК 9 ойда 2,34 млн троя унцияси миқдорида олтин ишлаб чиқариб, 95,3 трлн сўмлик маҳсулот билан ўз рекордини янгилади. Комбинатнинг биринчи ярим йилликдаги даромади 4,7 млрд долларни, соф фойдаси эса 1,51 млрд долларни ташкил этди.
