Ўзбекистонда саккиз ой ичида энг кўп қайси автомобиллар ишлаб чиқарилди?

2026-йил январ–август ойларида Ўзбекистонда жами 314 244 дона автомобил ишлаб чиқарилди. Шундан 310 389 донаси енгил автомобиллар, 3 855 таси эса юк автомобиллари сонига тўғри келди. Бу ҳақда Миллий статистика қўмитаси эълон қилган маълумотларда кўриш мумкин.

Маълумотларга кўра, автомобил ишлаб чиқариш ҳажми ўтган йилнинг мос даврига нисбатан 9,5 фоизга ошган. 2025-йилнинг январ–август ойларида 287 066 дона автомобил ишлаб чиқарилганди.

Алоҳида моделлар кесимида қаралганда, энг катта ўсиш BYDда кузатилди. Унинг ишлаб чиқариш ҳажми 12 930 донадан 23 850 донагача кўтарилиб, қарийб икки баробарга ошган.

Шунингдек, Cobalt ишлаб чиқариш ҳажми 99 013 донадан 107 141 донага, Onix 20 241 донадан 23 498 донага ошган. Haval ишлаб чиқариши ҳам 5 303 донадан 6 227 донага кўпайган.

Бироқ Cobalt ҳамон мамлакатда энг кўп ишлаб чиқарилаётган автомобил сифатида етакчиликни сақлаб қолмоқда. Январ–август ойларида ушбу моделдан 107 141 дона ишлаб чиқарилган. Бу ўтган йилнинг мос даврига нисбатан 8 128 донага кўп.

Бошқа моделлардан махсус енгил автомобиллар ишлаб чиқарилиши 35 936 донадан 38 215 донага, KIA 17 166 донадан 19 374 донага, Chery 5 909 донадан 5 751 донага ўзгарган. Chevrolet Damas Move модели эса жорий йилда ишлаб чиқариш статистикасига киритилиб, 1 530 дона автомобил тайёрланган.

Камайиш кузатилган моделлар

Январ–август ойларида айрим моделларда ишлаб чиқариш ҳажми пасайган. Жумладан, Damas ишлаб чиқариши 57 882 донадан 55 022 донага тушган. Tracker ҳам 29 930 донадан 29 781 донага камайган.

Шунингдек, 2025 йилда 42 дона ишлаб чиқарилган TANK 500 модели жорий йилнинг январ–август ойларида ишлаб чиқарилмаган.

Эслатиб ўтамиз, Cobalt мамлакатда энг кўп ишлаб чиқарилаётган автомобил бўлиб қолаётган бўлса-да, унинг ички бозордаги сотувлари камайиб бормоқда.