O‘zbekistonliklar uchun konsullik xizmatlari mobil ilovasi ishga tushdi

Tashqi ishlar vazirligi tomonidan ishlab chiqilgan Consular Services mobil ilovasi ishga tushirildi. Yangi platforma xorijda yashovchi yoki chet elga sayohat qilishni rejalashtirayotgan o‘zbekistonliklarga konsullik xizmatlaridan masofadan turib foydalanish imkonini beradi.

Ilovada O‘zbekistonning xorijdagi elchixonalari va konsullik muassasalari haqidagi yagona ma’lumotlar bazasi shakllantirilgan. Foydalanuvchilar diplomatik vakolatxonalarning manzili, aloqa ma’lumotlari hamda joylashuvi haqidagi dolzarb ma’lumotlarni olishi mumkin.

Shuningdek, ilova orqali fuqarolar o‘zlari turgan davlat yoki hudud qaysi konsullik okrugiga tegishli ekanini aniqlash imkoniyatiga ega bo‘ladi.

Loyihaning dastlabki bosqichida O‘zbekistonga qaytish sertifikatini rasmiylashtirish, vaqtinchalik yoki doimiy konsullik ro‘yxatidan o‘tish xizmatlari yo‘lga qo‘yilgan.

Tashqi ishlar vazirligi kelgusida ilovadagi xizmatlar sonini bosqichma-bosqich kengaytirishni rejalashtirmoqda. Bu orqali xorijdagi fuqarolar uchun davlat xizmatlaridan foydalanish yanada qulaylashadi.

Platformaning muhim afzalliklaridan biri anketa va arizalarni avtomatik to‘ldirish tizimi hisoblanadi. Unda majburiy maydonlarning qariyb 80 foizi avtomatik shakllantiriladi.

Viza ma’lumotlari ham joylashtiriladi

Mobil ilovada xorijiy davlatlarning viza talablariga oid maxsus axborot bo‘limi ham mavjud. Hozircha mazkur xizmat sinov rejimida ishlamoqda va ma’lumotlar bazasi doimiy ravishda yangilanib bormoqda.

Ilovani Android qurilmalari uchun Play Market va iOS qurilmalari uchun App Store orqali yuklab olish mumkin.

Eslatib o‘tamiz, 2026 yil yil aprel oyida xorijdagi o‘zbekistonliklar uchun elchixonalarga onlayn navbat olish xizmati ham ishga tushirilgan edi. Undan Yagona interaktiv davlat xizmatlari portali orqali bepul foydalanish mumkin.