Қамчибек Ташиев прокурорлардан айбловларни бекор қилишни сўради
Айни кунларда Қирғизистонда Миллий хавфсизлик қўмитаси собиқ раиси Қамчибек Ташиевга оид суд жараёнлари бўлиб ўтмоқда. Унга «Ҳокимиятни зўрлик билан эгаллаш ёки ушлаб туриш, шунингдек, конституциявий тузумни зўрлик билан ўзгартиришга қаратилган ҳаракатлар» ҳамда «Мансаб ваколатини суиистеъмол қилиш» моддалари билан жиноий иш қўзғатилган.
29 июн куни Бишкекда Азирета Медеров раислигида ёпиқ эшиклар ортида Қамчибек Ташиевнинг суди бўлиб ўтди.
Адвокат Икрамидин Айтқуловнинг сўзларига кўра, суд мажлисида Миллий хавфсизлик давлат қўмитасининг собиқ раиси Қамчибек Ташиэв айбловларни бекор қилиш таклифи билан давлат прокурорларига мурожаат қилган.
Ҳимоячининг сўзларига кўра, адвокатлар бу ташаббусни қўллаб-қувватлаган, аммо прокуратура бу таклифга жавоб бермаган.
Маълумот ўрнида Қамчибек Ташиэв 2026 йил 10 февралда Бош вазир ўринбосари ва Миллий хавфсизлик давлат қўмитаси раҳбари лавозимидан четлатилди. Кейинчалик унга «Ҳокимиятни зўрлик билан эгаллаш ёки ушлаб туриш, шунингдек, конституциявий тузумни зўрлик билан ўзгартиришга қаратилган ҳаракатлар» ҳамда «Мансаб ваколатини суиистеъмол қилиш» моддалари билан жиноий иш қўзғатилди.
Аввалроқ Қирғизистон парламенти спикери Марлен Маматалиэв Қамчибек Ташиевни шоқолга, унинг тарафдорларини эса шоқол болаларига қиёслаган эди.
