Қозоғистон нефти ортилган танкерлар ҳужумга учради
Қора денгиздаги Каспий қувур ўтказгич консорциуми терминали яқинида Қозоғистон нефти ортилган танкерларга «дрон»лар ҳужум қилди.
Қозоғистондан келаётган нефт орттирилган иккита танкер Қора денгиздаги Каспий қувур ўтказгич консорциуми (КҚК) терминали яқинида учувчисиз учиш аппаратлари зарбаси оқибатида шикастланди. Бу ҳақда вазиятдан хабардор «РИА Новости» манбаси маълум қилди.
Унга кўра, Delta Harmony ва Matilda танкерларининг юк ускуналари шикастланган. Кемаларнинг сузувчанлиги бузилмаган. Reuters манбалари хабар беришича, Freud ва Delta Supreme танкерлари ҳам ҳужумга учраган.
«КазМунайГаз» компанияси Matilda танкерига берилган зарбани тасдиқлади. Компания маълумотларига кўра, кемада портлаш содир бўлган, шундан сўнг ёнғин бошланган. Жабрланганлар йўқ. Зарарни баҳолаш давом этмоқда. Matilda танкерига КҚК терминалидан нефт юклаш 18 январга режалаштирилган эди.
Delta Harmony ва Matilda танкерлари «Тенгизшевройл» ва «Карачаганак Петролеум Оперейтинг» консорциумлари томонидан ижарага олинган. Улар Қозоғистондан нефт ташийди. Қозоғистон Энергетика вазирлиги КҚК терминали штат режимида ишлашда давом этаётганини маълум қилди. Нефт жўнатиш ВПУ-1 масофавий причал қурилмаси орқали амалга оширилмоқда.
Аввалроқ, Новороссийск портидан Қозоғистон нефти экспорти кескин камайгани хабар қилинган эди. Бунга ноқулай об-ҳаво, причалларнинг техник хизмати ва учувчисиз учиш аппаратлари томонидан етказилган зарарлар сабаб бўлди.
Трейдерлар маълумотларига кўра, январ ойида CPC Blend навли нефт етказиб бериш кунига 800–900 минг баррелни ташкил этади. Бу декабр ўрталарида кутилган ҳажмдан 45 фоизга пастдир. Режалаштирилган 45 та партиядан камида 21 та жўнатиш бекор қилинди.
Таклифнинг қисқариши аллақачон нархларнинг ошишига олиб келди. Қозоғистон нефти бир йил ичида илк бор мукофот (премия) билан сотилмоқда. Охирги битимлар Dated Brent нархига баррел учун тахминан 1,2 доллар устама билан амалга оширилди. Bloomberg таъкидлашича, охирги ҳафталарда об-ҳаво шароити туфайли нефт жўнатиш бир неча бор тўхтатилган. Бу техник хизмат кўрсатишдан кейин иккинчи масофавий причални ишга туширишни кечиктирди. Ноябр охирида яна бир причал Украина дронлари томонидан шикастланган эди. Экспорт ҳажмини сақлаб қолиш учун Қозоғистонга камида иккита ишлаб турган КҚК причали зарур.
