Қозоғистонда йиллик инфляция кетма-кет тўққизинчи ой давомида секинлашди

Қозоғистонда йиллик инфляция кетма-кет тўққиз ой давомида пасайиб, 10,3 фоизни ташкил этди. Бу ҳақда мамлакат Миллий банки раиси Тимур Сулаймонов ҳукумат йиғилишида маълум қилди.

Унинг сўзларига кўра, инфляциянинг секинлашишига ўртача даражада қатъий пул-кредит сиёсати, минимал захира талаблари орқали пул массасини назорат қилиш, олтин харид қилиш операцияларининг таъсири, шунингдек, ҳукуматнинг инфляцияга қарши чоралари ва истеъмол кредитларини тартибга солишга қаратилган макропруденциал сиёсати хизмат қилган.

Шу билан бирга, Сулаймонов нархлар тўлиқ барқарорлашгани ҳақида хулоса чиқаришга ҳали эрта эканини таъкидлади.

«Инфляцияни янада пасайтириш учун коммунал хизматлар тарифлари ва ёқилғи нархларини босқичма-босқич ҳамда мувозанатли тарзда ошириш, республика бюджети тақчиллиги ортишига йўл қўймаслик мақсадида самарали фискал консолидацияни амалга ошириш, шунингдек, маҳаллий ишлаб чиқарилган маҳсулотлар таклифининг реал ўсишини қўллаб-қувватлайдиган самарали квази-фискал рағбатлантириш чораларини давом эттириш зарур», — деди Миллий банк раиси.

Сулаймонов, давом этаётган геосиёсий кескинлик ва жаҳон озиқ-овқат нархларининг ўсишини Қозоғистон иқтисодиёти учун асосий ташқи хавфлардан бири сифатида қайд этди.

Эслатиб ўтамиз, аввалроқ Қозоғистон банк активлари сўнгги беш йил ичида рекорд даражада ошгани ҳақида ёзган эдик.