Рамазонда 700 минг оилага ижтимоий ёрдам кўрсатилди
Ўзбекистонда Рамазон ойида 700 мингга яқин оилага берилган ижтимоий ёрдам дастури уй-жой таъмири, тиббий хизмат ва моддий қўллаб-қувватлашни қамраб олди.
Ўзбекистонда Рамазон ойи давомида 700 мингга яқин оила ижтимоий ёрдам билан таъминланди. Бу ҳақда Ижтимоий ҳимоя миллий агентлиги маълум қилди. Мазкур дастур президент ташаббуси билан амалга оширилди.
Маълум қилинишича, дастур доирасида эҳтиёжманд оилаларга манзилли моддий ёрдам кўрсатилди, уй-жойларни таъмирлаш ишлари амалга оширилди ҳамда тиббий хизматлар таъминланди. Барча тўловлар март ойи бошига қадар тўлиқ етказиб берилган.
Дастурда тиббий ёрдамга алоҳида эътибор қаратилди. Қатор фуқаролар учун ҳаётий аҳамиятга эга бўлган мураккаб жарроҳлик амалиётларини ўтказиш учун маблағлар ажратилди. Бу орқали аҳолининг саломатлигини қўллаб-қувватлаш мақсад қилинган.
Шунингдек, уй-жой шароитларини яхшилаш бўйича ишлар амалга оширилди. Энг кўп эҳтиёж сезилган хонадонларда таъмирлаш ишлари бошланиб, хавфсиз ва қулай яшаш муҳитини яратишга эътибор қаратилди. Бунда энергия самарадорлигини ошириш ҳам муҳим йўналиш сифатида белгиланди.
Дастур Ижтимоий ҳимоя миллий агентлиги ва «Вақф» хайрия жамоат фонди ҳамкорлигида амалга оширилди. Эҳтиёжмандлар рўйхати Ижтимоий реестр асосида шакллантирилиб, ёрдамнинг шаффоф ва адолатли тақсимланиши таъминланди.
