Саудия Арабистонидаги ҳужумлардан кейин ҳам Ўзбекистоннинг Жидда ва Мадинага парвозлари давом этмоқда

Саудия Арабистонидаги Ар-Риёд халқаро аэропортига 10-октябрь куни уюштирилган ҳужум оқибатида камида 12 киши ҳалок бўлди, 309 киши яраланди. Шунга қарамай, «Uzbekistan Airways» 11-октябрь куни Тошкентдан Жидда ва Мадинага парвозлар тасдиқланган жадвал асосида амалга оширилишини маълум қилди.

Reuters хабарига кўра, бу бир ҳафта ичида аэропортга қилинган учинчи ҳужум ҳисобланади. Ҳалок бўлганлар орасида тўрт нафар Саудия Арабистони, икки нафар Бангладеш фуқароси, шунингдек, АҚШ, Иордания, Фаластин, Сурия, Судан ва Миср фуқаролари бор. Жароҳатланганларнинг айримлари оғир аҳволда.

Вазиятдан хабардор манбанинг Reuters’га айтишича, касалхоналар тез ёрдам машиналари ва вертолётларда олиб келинган ярадорлар билан тўлиб кетган.

«Uzbekistan Airways» эса 11-октябрь ҳолатига кўра, Тошкент—Жидда—Тошкент ва Тошкент—Мадина—Тошкент йўналишларидаги қатновлар тасдиқланган ҳаракат жадвали асосида давом этаётганини билдирди.

Авиакомпания минтақадаги вазиятни доимий кузатиб бораётгани ва ҳар бир парвоз олдидан долзарб маълумотлар асосида хавф-хатарларни баҳолаётганини қайд этди. Йўловчилар ва экипаж аъзоларининг хавфсизлиги парвозларни амалга ошириш бўйича қарор қабул қилишда асосий мезон ҳисобланади.

Қатновлар жадвалида ўзгаришлар юз берса, йўловчилар бу ҳақда зудлик билан хабардор қилинади.