«Сизлар жаҳон шахмат оламида янги тарих яратган олтин авлодсиз». Мирзиёев шахматчиларни табриклади

Президент Шавкат Мирзиёев Ўзбекистон терма жамоасини 46-Бутунжаҳон шахмат олимпиадасида ғолиб бўлгани билан табриклади. Давлат раҳбари эришилган ютуқ тарихий ғалабалиги, икки карра олимпиада чемпиони бўлиш улкан зафар эканини қайд этди.

Мусобақада 200 дан зиёд мамлакатдан икки мингга яқин энг кучли ва машҳур гроссмейстерлар, номдор жамоалар иштирок этган.

«Муросасиз беллашувларда кўрсатган ақл-заковатингиз, юксак иродангиз, маҳорат ва жасоратингиз учун бутун эл-юртимиз, дунё шахмат жамоатчилиги сизларга тасаннолар айтмоқда. Сизлар – Янги Ўзбекистон қаҳрамонлари, жаҳон шахмат оламида янги тарих яратган олтин авлодсиз. Бутун халқимиз сизлар билан чексиз фахрланади, ғурурланади», дейилади президент қутлов хатида.

Шавкат Мирзиёев табригида ўзбек фарзандлари олимпиада чемпиони – Ҳиндистон жамоасини мағлуб этганига тўхталган. Йигитлар қадимий шахмат мактаби ва кўплаб гроссмейстерларга эга бўлган Хитой жамоаси устидан тарихий ғалабани қўлга киритганини алоҳида эътироф этган.

«Дунё рейтингида биринчи ўринни эгаллаб келаётган, ольти карра Олимпиада чемпиони бўлган АҚШ жамоасидан ҳам устун келдингиз», дея қайд этган давлат раҳбари.

Қутлов матнида терма жамоа сафида бўлган шахматчилар Нодирбек Абдусатторов, Нодирбек Ёқуббоев, Жавоҳир Синдоров, Муҳиддин Мадаминов, Шамсиддин Воҳидов ва Жаҳонгир Воҳидов бирма-бир эсланган. Улар кўрсатган жасорат эътироф этилган.

«Бир сўз билан айтганда, терма жамоамиз аъзоларининг ҳар бири ўзига ишониб, фақат олдинга қараб борганини кўриб, Янги Ўзбекистонда қандай буюк шахмат мактаби, шахматчилар авлоди шаклланганига бутун дунё тан берди. Мусобақаларда иккинчи таркиб билан иштирок этган жамоамиз қайд этган натижа ҳам бизни қувонтиради», дейилади табрикда.

Президент аёллар жамоаси ҳам кескин курашларда ҳақиқий матонат намунасини кўрсатганини қайд этган. Улар АҚШ жамоаси билан тенгма-тенг баҳс олиб борганлари, 11 та турда 7 та ютуққа эришиб, ўн учинчи ўринни қўлга киритгани ҳам муҳим натижа эканини билдирган.

«Ўзбекистон шахмат федерацияси ФИДЕ томонидан 2026 йилда «Энг яхши федерация» номинациясида ғолиб деб топилгани, тажрибали мураббий, гроссмейстер Рустам Қосимжонов ФИДЕнинг фахрий вице-президенти, Ҳулкар Тоҳиржонова ФИДЕнинг Марказий Осиё давлатлари бўйича минтақавий президенти этиб сайланганини Ўзбекистоннинг шахмат мамлакати сифатида обрў-эътибори ошиб бораётганининг яна бир далили сифатида қабул қиламиз», дейилади қутловда.

Ўз навбатида жорий йилнинг ноябрь ойида яна бир катта шахмат байрами кутиб тургани таъкидланган. Жаҳон тожи учун бўладиган тарихий беллашувда шахматчи Жавоҳир Синдоровга улкан зафарлар тиланган.