Surxondaryoda sobiq IIB xodimi voyaga yetmagan qizning nomusiga tegishda gumonlanmoqda

Surxondaryo viloyatining Denov tumanida ichki ishlar organlarining sobiq xodimiga nisbatan qo‘zg‘atilgan jinoyat ishi tergovi yakunlandi.

Viloyat prokuraturasi ma’lumotiga ko‘ra, Denov tumani IIB Jamoat xavfsizligi xizmati huquqbuzarliklar profilaktikasi bo‘limida voyaga yetmaganlar masalalari bo‘yicha inspektor-psixolog lavozimida ishlagan A.R.ga nisbatan tayyorlangan ayblov xulosasi sudga yuborilgan.

Tergov ma’lumotlariga ko‘ra, sobiq xodim 14 yoshga to‘lmagan qizga nisbatan jinsiy xarakterdagi jinoyatlarni sodir etganlikda gumon qilinmoqda. Shu munosabat bilan unga O‘zbekiston Respublikasi Jinoyat kodeksining bir nechta moddalari bo‘yicha ayblov qo‘yilgan.

Xususan, ayblanuvchiga Jinoyat kodeksining 118-moddasi 4-qismi (14 yoshga to‘lmagan shaxsning nomusiga tegish), 129-moddasi 3-qismi (zo‘rlik ishlatib yoki qo‘rqitish orqali 16 yoshga to‘lmagan shaxsga nisbatan uyatsiz-buzuq harakatlar sodir etish) hamda 206-moddasi 1-qismi (hokimiyat yoki mansab vakolatidan chetga chiqish) bilan ayblov e’lon qilingan.

Prokuratura xabarida jinoyatning aniq qachon sodir etilgani haqida ma’lumot keltirilmagan. Shuningdek, jabrlanuvchi va uning oilasiga oid shaxsiy ma’lumotlar oshkor etilmagan.

Tergov harakatlari davomida to‘plangan dalillar asosida ish bo‘yicha ayblov xulosasi rasmiylashtirilib, mazmunan ko‘rib chiqish uchun sud organlariga taqdim etilgan.

Ayni vaqtda ayblanuvchining aybi yoki aybsizligi bo‘yicha yakuniy huquqiy baho sud tomonidan beriladi. O‘zbekiston qonunchiligiga muvofiq, shaxs sudning qonuniy kuchga kirgan hukmiga qadar aybsiz deb hisoblanadi.

Eslatib o‘tamiz, avvalroq Andijonda ham IIB xodimi voyaga yetmagan qiz bilan jinsiy aloqa qilgani uchun qamoqqa olingandi.