Тошкентда Disneyland ва янги креатив парк барпо этилиши мумкин
Саида Мирзиёева The Walt Disney Company вице-президенти билан компаниянинг Марказий Осиёдаги расмий ваколатхонасини айнан Ўзбекистонда очиш масаласини кўриб чиқди.
Ўзбекистон томони The Walt Disney Company билан ҳамкорликда мамлакатда болалар учун ўзбек тилидаги махсус телеканал, замонавий Cinema Park ва машҳур Disneyland тематик боғини барпо этиш таклифини илгари сурмоқда. Бу ҳақда Президент Админстрацияси раҳбари Саида Мирзиёева маълум қилди.
Унинг ёзишича, Тошкентда The Walt Disney Company вице-президенти, Эмми мукофотининг 7 карра соҳиби Ҳайма Вашингтон билан учрашув бўлиб ўтган.
«Мақсадимиз — Ўзбекистон пойтахтини болалар контенти ишлаб чиқариш бўйича минтақавий марказга айлантириш. Голливуд мутахассислари билан ҳамкорликда аниматорлар, режиссёрлар ва ссенарийнависларнинг янги авлодини тайёрламоқчимиз. Жаноб Вашингтон мамлакатимизда амалга оширилаётган ислоҳотларга қизиқиш билдирди ҳамда барча ташаббусларимизни қўллаб-қувватлашга тайёр эканини айтди», - дея ёзди у ўзининг Телеграм-каналида. 2
Таъкидлашича, Ўзбекистонда «Disney»нинг Марказий Осиёдаги ваколатхонасини очиш ва контенти тўлиқ ўзбек тилидаги телеканал ташкил этишга қизиқиш билдирган.
Муҳим лойиҳалар қаторида халқаро компаниялар учун имтиёзли шароитлар яратиладиган «Cinema Park» креатив паркини ташкил этиш, шунингдек, келгусида минтақа туризми учун янги драйверга айланадиган «Disneyland» тематик боғини барпо этиш ғояси ҳам бор.
