Тошкентда октябрдан жамоат транспортида йўлкира нархлари оширилади
Метро ва автобусларда картадан тўлаш ёки онлайн тўлов 1700 сўмдан 2500 сўмга ошади. Нақд тўловдаги йўлкира эса 3000 сўм бўлиб, ўзгаришсиз қолади.
© vaqt.uz2026-йил 1-октябрдан бошлаб Тошкент шаҳрида жамоат транспортида йўл ҳақи картадан тўлов учун 1700 сўмдан 2500 сўмга, яъни 47 фоизга оширилади. Бу ҳақда Халқ депутатлари Тошкент шаҳар кенгашининг қарори эълон қилинди.
Бир соатлик тарифлар сақланади
Янги тартибга кўра, электрон тўловдан фойдаланувчилар учун бир соатлик тарифлар ҳам амал қилади. ATTO картаси орқали автобусда тўлов қилинганидан кейин 60 дақиқа ичида бошқа автобусга ўтилса, иккинчи қатнов учун 1500 сўм тўланади. Шу вақт ичидаги учинчи ва тўртинчи автобус қатновлари эса бепул бўлади.
Метродан 60 дақиқалик тариф доирасида бир марта фойдаланиш мумкин. Метрога иккинчи марта кирилганда янги 60 дақиқалик ҳисоб бошланади.
Шунингдек, транспорт карталарининг кунлик ва ойлик тарифлари ҳам белгиланди. Автобус учун бир кунлик карта 11 минг 500 сўм, 30 кунлик карта 250 минг сўм бўлади. Метродa кунлик тариф 13 минг 500 сўмни ташкил этади. Метро ва автобусдан мунтазам фойдаланадиган йўловчининг бир ойлик йўл харажати 345 минг сўмгача чиқади.
Ўқувчилар, талабалар, нафақахўрлар ва ногиронлиги бўлган шахслар учун транспорт картаси тарифларига 50 фоизлик чегирма қўлланади. Жамоат транспортидан бепул фойдаланиш ҳуқуқига эга бўлган фуқароларнинг имтиёзлари эса сақлаб қолинади.
Бундан ташқари, йўловчи багажини ташиш учун 4 минг сўмлик тариф белгиланади. Барча тарифлар қўшилган қиймат солиғи (ҚҚС) ҳисобга олинган ҳолда кўрсатилган.
Ҳудудларда жамоат транспорти нархлари қанча?
Тошкентда ҳозир амал қилаётган 1 700 сўмлик электрон йўлкира кўплаб ҳудудлардагидан паст эди. Янги тариф жорий этилгач, пойтахтда электрон тўлов орқали йўл ҳақи ҳудудларнинг аксариятидаги нархдан юқори бўлади.
Hududlar | 💳 Elektron to‘lov | 💵 Naqd pulga QR-chipta |
Toshkent shahri | 2 500 so‘m | 3 000 so‘m |
Toshkent viloyati | 2 000 so‘m | 2 600 so‘m |
Namangan viloyati | 2 300 so‘m | 3 000 so‘m |
Farg‘ona viloyati | 2 400 so‘m | 3 000 so‘m |
Andijon viloyati | 2 100 so‘m | 3 000 so‘m |
Samarqand viloyati | 2 000 so‘m | 4 000 so‘m |
Buxoro viloyati | 2 000 so‘m | 3 000 so‘m |
Sirdaryo viloyati | 2 000 so‘m | 3 000 so‘m |
Surxondaryo viloyati | 2 000 so‘m | 3 000 so‘m |
Xorazm viloyati | 2 300 so‘m | 3000 so‘m |
Qoraqalpog‘iston Resp. | 2 000 so‘m | 2 600 so‘m |
Jizzax viloyati | 2 100 so‘m | 3 000 so‘m |
Qashqadaryo viloyati | 1 700 so‘m | 2 500 so‘m |
Navoiy viloyati | 1600 so‘m | 2 000 so‘m |
Ҳудудларда электрон тўлов орқали йўл ҳақи асосан 2 000 сўм атрофида. Бухоро, Сирдарё, Сурхондарё ва Қорақалпоғистонда ҳам йўловчилар электрон тўлов учун 2 000 сўм тўлайди.
Айрим ҳудудларда эса тариф бироз юқорироқ. Андижон ва Жиззахда электрон йўл ҳақи 2 100 сўм, Наманган ва Хоразмда 2 300 сўм, Фарғонада 2 400 сўм. Қашқадарёда 1 700 сўмлик тариф, Навоийда эса 1 600 сўмлик тариф сақланиб қолган.
ҚР-чипта орқали йўл ҳақи кўпчилик ҳудудларда 3 000 сўм. Тошкент вилояти, Хоразм ва Қорақалпоғистонда бу усулда 2 600 сўм тўланади. Қашқадарёда 2 500 сўм, Самарқандда эса ҚР-чипта нархи 4 000 сўм этиб белгиланган. Бу бошқа ҳудудларнинг аксариятидаги 3 000 сўмлик тарифдан 1 000 сўм юқори ва рўйхатдаги энг катта ҚР-чипта нархи ҳисобланади.
Эслатиб ўтамиз, 2026-йил 1-сентябрдан бошлаб брутто-шартнома асосида ишлаётган шаҳар автобусларида йўловчилар автобусга чиқиши билан йўлкира ҳақини тўлаши шарт.
Тўлов транспорт ёки ижтимоий карта, банк картаси, смартфон ва бошқа контактсиз воситалар орқали амалга оширилади. Йўлкира ўз вақтида тўланмаса ёки йўловчи имтиёзини тасдиқламаса, у чиптасиз ҳаракатланаётган ҳисобланади ва жаримага тортилиши мумкин.
