Трамп: «Путин билан беҳуда учрашишга вақтимни сарфламоқчи эмасман»
АҚШ президенти Доналд Трампнинг билдиришича, у фақат Украинада тинчлик келишувини муҳокама қилиш бўйича аниқ келишув мавжуд бўлсагина Владимир Путин билан учрашишга тайёр.
25 октябр куни АҚШ президенти Доналд Трамп Кремл раҳбари Владимир Путин билан эҳтимолий музокаралар ҳақида ўз позициясини билдирди. Унинг таъкидлашича, ҳар қандай учрашув фақат биргина ҳолатда — Украинада тинчлик келишувини муҳокама қилишга тайёрлик бўлгандагина бўлиши мумкин.
«Мен Путин билан фақат Украинада тинчлик келишувига эришиш бўйича тўлиқ англашув мавжуд бўлса, учрашаман», — деди Трамп журналистлар саволига жавобан.
Америка раҳбари дипломатик мулоқотлар фақат аниқ натижа бериши мумкин бўлган ҳолдагина маъно касб этишини таъкидлади.
«Биз нимага келишмоқчи эканимизни аниқ билишимиз керак. Мен вақтимни бундай нарсага сарфламоқчи эмасман», — деди Трамп.
Эслатиб ўтамиз, илгари Трамп ва Путин Будапештда учрашиши режалаштирилган эди. Бироқ АҚШ президенти музокараларни бекор қилиб, шундан сўнг Россиянинг ёқилғи соҳасига қарши янги санкциялар жорий этди. Бу Вашингтоннинг Москвага нисбатан сўнгги ҳафталардаги энг қаттиқ сиёсий чораси бўлди.
