Трамп ва унинг оиласи ўтган йиллар учун солиқ текширувларидан бутунлай озод қилинди
Трамп 1970 йиллардан бери ўз солиқ декларацияларини эълон қилишдан бош тортган биринчи АҚШ президенти ҳисобланади.
АҚШ Адлия вазирлиги Ички даромадлар хизматига (IRS) Президент Доналд Трамп ва унинг оила аъзоларининг ўтган йиллардаги солиқ декларацияларини текширишни тақиқлади. Бу қарор Трампнинг ўз солиқ ҳужжатлари сизиб чиққани сабабли мазкур хизмат устидан берган суд даъвоси ўзаро келишув билан якунланганидан кейин қабул қилинди.
Маълум қилинишича, Трамп ушбу даъво доирасида солиқ идорасидан 10 миллиард доллар товон пули талаб қилган эди. Низони келишув йўли билан ҳал этиш доирасида, аввалги президент маъмурияти даврида ноқонуний таъқибга учраганини даъво қилган Трамп тарафдорларига компенсация тўлаш учун 1,8 миллиард долларлик фонд ташкил этилиши эълон қилинди. Трампнинг ўзига эса пул тўланмасдан, фақат расмий узр сўралиши билдирилган. Кейинроқ Адлия вазирлиги сайтида эълон қилинган ва бош прокурор вазифасини бажарувчи Тодд Бланш томонидан имзоланган алоҳида ҳужжатда АҚШ ҳукумати Трампга нисбатан солиқ даъволаридан воз кечиши ва бундан буён унга қарши даъво қўзғатиш ҳуқуқидан бутунлай маҳрум бўлиши кўрсатилган.
Адлия вазирлиги ушбу тақиқ фақат ўтган йиллардаги декларацияларга тегишли эканини, Трамп ва унинг оиласи келажакда топширадиган солиқ ҳисоботларига дахл қилмаслигини тушунтирди. Мазкур қарор Конгресснинг солиқлар бўйича қўмитаси раҳбари, демократ Ричард Нил томонидан «коррупция» деб баҳоланди. Трамп 1970 йиллардан бери ўз солиқ декларацияларини эълон қилишдан бош тортган биринчи АҚШ президенти ҳисобланади.
Маълумот учун, Трампнинг Ички даромадлар хизматига (IRS) қарши даъво аризаси 2026 йилнинг январ ойида топширилган эди. Бунга унинг биринчи президентлик даврида, яъни 2018–2020 йиллардаги солиқ декларациялари ОАВда эълон қилиб юборилгани сабаб бўлган. Ушбу ҳужжатларни матбуотга сизидирган собиқ солиқ ходими Чарлз Литтлжон 2024 йилда беш йиллик қамоқ жазосига ҳукм қилинган эди.
