Уруш хавфи чекинди: Трампнинг баёнотларидан сўнг нефт нархи тушмоқда

Бугун, 15 январ куни жаҳон бозорларида нефт нархи 3 фоиздан кўпроққа пасайди. Бу ҳолат АҚШ президенти Доналд Трампнинг Эрондаги намойишлар вақтида содир этилган қотилликлар камайгани ҳақидаги баёнотларидан сўнг кузатилди. Ушбу изоҳлар Эронга қарши эҳтимолий ҳарбий ҳаракатлар ва таъминотдаги узилишлар бўйича хавотирларни юмшатди.

Маълумотларга кўра, Brent маркали нефт фючерслари 3,14 фоизга арзонлашиб, бир баррели 64,43 долларга тушди. WTI маркали нефт эса 3,13 фоизга пасайиб, бир баррели 60,08 доллардан савдо қилинди. Бу икки марка ҳам бир кун олдин 1 фоиздан кўпроққа ўсган эди.

Таҳлилчиларга кўра, Трампнинг чиқиши АҚШ томонидан Эронга нисбатан ҳарбий зарба эҳтимоли камайгани ҳақида сигнал сифатида қабул қилинган. Президент чоршанба куни унга Эронда ҳукуматга қарши намойишчилар ўлдирилиши кескин камайгани ҳақида ахборот берилганини, шунингдек, оммавий қатл режалари мавжуд эмаслигини айтган.

Nissan Securities Investment компанияси таҳлилчиси Хироюки Кикукаванинг айтишича, «АҚШ Эронга қарши ҳарбий ҳаракатларни бошламайди деган умидлар фонида сотиш босими устунлик қилган». У, шунингдек, АҚШда нефт захиралари кутилганидан юқори эканлиги нархларга салбий таъсир этган омил сифатида қайд этди.

Таҳлилчи фикрича, геосиёсий хатарлар сақланиб қолаётганига қарамасдан, қисқа муддатда WTI нефти 55–65 доллар оралиғида савдо қилиниши эҳтимоли юқори. Бу эса бозорда эҳтиёткорлик кайфияти ҳануз устун эканини кўрсатади.