Uzbekistan Airways Boeing билан 22 та Dreamliner келишувини расмийлаштирди
Вашингтондаги C5+1 саммити доирасида Uzbekistan Airways ва Boeing ўртасида янги 787-9 Dreamliner самолётлари учун қатъий шартнома имзоланди.
2025 йил 6 ноябр куни АҚШ пойтахти Вашингтон шаҳрида бўлиб ўтган C5+1 форматидаги минтақавий саммит доирасида Uzbekistan Airways авиакомпанияси ва Boeing корпорацияси ўртасида муҳим келишув имзоланди. Ҳужжатга кўра, аввал берилган 8 та Boeing 787-9 Dreamliner самолёти учун опцион шартлар энди расман қатъий буюртмага айлантирилди, деб хабар бермоқда авиакомпания.
Ушбу ҳужжатни Uzbekistan Airways Бошқаруви раиси Шуҳрат Худойқулов ва Boeing’нинг Евросиё ва Ҳиндистон бўйича савдо ва маркетинг бўйича вице-президенти Пол Риги имзолади.
Янги келишув натижасида Ўзбекистон миллий авиакомпаниясининг замонавий, узоқ магистралли ва кенг фюзеляжли Boeing 787-9 Dreamliner туркумидаги самолётларига умумий буюртмаси 22 тага етди. Бу эса компаниянинг халқаро йўналишлар географиясини кенгайтириш ва глобал авиация бозорида рақобатбардошлигини кучайтиришга хизмат қилади.
Расмий имзолаш маросимида АҚШ савдо вазири Ҳовард Латник, Ўзбекистон Республикаси инвестициялар, саноат ва савдо вазири Лазиз Қудратов ҳамда АҚШнинг глобал ҳамкорлик бўйича махсус элчиси Паоло Замполли ҳам иштирок этди.
Uzbekistan Airways компанияси учун бу келишув нафақат авиафлотни янгилаш, балки ташқи бозордаги мавқеини мустаҳкамлашга қаратилган стратегик қадам ҳисобланади. Boeing томонидан етказиб бериладиган Dreamliner самолётлари узоқ масофали парвозлар учун мўлжалланган бўлиб, юқори самарадорлик ва қулайлик даражаси билан ажралиб туради.
