Uzbekistan GTL заводининг IPOсига халқаро ташкилотлар қизиқиш билдирмоқда

«Uzbekistan GTL» заводини хусусийлаштириш жараёни ва акцияларини бирламчи оммавий жойлаштириш (IPO) бўйича дастлабки босқичлар бошланди. Бу ҳақда Давлат активларини бошқариш агентлиги директори Соҳибжон Муродов 8 октябрь куни ўтказилган матбуот анжуманида сўз очди, дея хабар берди Vaqt.uz мухбири.

Агентлик раҳбарининг сўзларига кўра, айрим йирик халқаро молиявий ташкилотлар GTL заводининг IPOсида иштирок этиш бўйича агентликка расман мурожаат билан чиққан.

«GTL бўйича бизда концепциямиз бор. Хусусийлаштириш босқичи бошланган. Шу билан бирга, IPO бўйича ҳам ишлар олиб борилмоқда. Биринчи IPOда иштирок этиш қизиқишини билдирган йирик халқаро ташкилотлар ҳам бор. Улар бизга қачон IPO қиласизлар, биз ҳам қатнашмоқчимиз, дея мурожаат қилишди. Бу биз учун яхши сигнал», – деди агентлик раҳбари.

Хусусийлаштириш санаси завод дарҳол сотилишини англатмайди

Президентнинг 145-сонли қарорига кўра, 29 та йирик компания, жумладан Uzbekistan GTL заводининг акцияларини 2026 йил иккинчи чорагида савдога чиқариш кўзда тутилган эди. Соҳибжон Муродов ушбу муддат бўйича аниқлик киритди.

«Шу муддатда хусусийлаштирилади дегани — у ўша пайтда сотиб юборилади дегани эмас. Бу хусусийлаштиришга тайёргарлик ва баҳолаш ишлари бошланишини билдиради. Ҳозир корхонанинг молия-хўжалик фаолиятини аудитдан ўтказиш ва унинг иқтисодиётга таъсирини таҳлил қилиш босқичидамиз», – дея тушунтирди у.