Европа Марказий банки аҳолини уйда нақд сақлашга чақирди
ЕМБ рақамли тўлов тизимлари исталган пайтда ишдан чиқиши мумкинлигини айтди ва ҳар бир Европа хонадонига фавқулодда ҳолат учун уйда 70–100 евро сақлашни тавсия қилди.
Европа Марказий банки сўнгги йилларда глобал хуружлар кучайганини қайд этиб, рақамли тўлов инфратузилмасида хавфларни камайтириш мақсадида аҳолига уйларида нақд пул сақлашни тавсия қилди. Ташкилот фикрича, пандемия, уруш ва энергия хавфлари ортидан рақамли тўлов тизимлари бир зумда ишдан чиқиши хавфи реал тус олган. Шу боис ЕМБ уйларда 70–100 евро миқдоридаги нақд захирани «хавфсизлик чораси» сифатида баҳоламоқда.
Баёнотда айтилишича, рақамли тўловлар кенг қўлланаётгани билан, тизимнинг тўлиқ ишдан чиқиши кенг қамровли оқибатларга олиб келиши мумкин. Бундай ҳолатда банкоматлар ишламаслиги, POS-терминаллар ўчиши ва онлайн-банкингнинг тўлиқ тўхташи эҳтимоли юқори. Шу шароитда асосий эҳтиёжлар учун фақат нақд пул орқали ҳисоб-китоб қилишнинг имкони қолади. ЕМБ ҳисоб-китобига кўра, 70–100 евро уч кунлик истеъмол эҳтиёжларини қоплашга етарли миқдор сифатида баҳоланган.
Қитъадаги давлатлар ҳам рақамли хавфлардан келиб чиқиб, турли тайёргарлик чораларини кўрмоқда. Масалан, Финландия рақамли тизимлар ишдан чиқишига чидамли махсус банкоматлар ўрнатиш режасини ишлаб чиқмоқда. Нидерландия, Австрия ва Швеция эса фуқароларни уйда нақд пул сақлашга чақирмоқда. Баъзи мамлакатларда эса муҳим инфратузилмани кучайтириш мақсадида тўлов тизимлари қайта кўриб чиқилмоқда.
Мутахассислар фикрича, рақамли инфратузилманинг улкан афзалликлари билан бирга, унинг изчил қатъий ишлашига боғлиқ бўлган хавфлар ҳам ошиб бормоқда. Электр таъминотидаги узилишлар, киберҳужумлар ёки инфратузилмадаги техник носозликлар аҳолининг кундалик молиявий амалиётларини жиддий издан чиқариши мумкин. Шундай шароитда ЕМБнинг ушбу тавсияси эҳтиёт чораси сифатида амалий аҳамият касб этади.
