Зеленскийнинг жуда йирик коррупцияда айбланаётган яқин ўртоғи Исроилга қочиб кетди

Украинада энергетика соҳасининг «сояли раҳнамоси» деб аталадиган тадбиркор Тимур Миндич мамлакатни тарк этиб, Исроилга қочиб кетди. Бу ҳақда Украина оммавий ахборот воситалари депутатлар ва коррупцияга қарши курашиш органлари вакилларига асосланиб, хабар бермоқда.

Миндич «Квартал 95» студиясининг мулкдорларидан бири ҳисобланади. Украина президенти Володимир Зеленский студиянинг асосчиси бўлган, бироқ президентлик лавозимига киришгач, ўз улушини шерикларига топширган.

Ўтган ҳафта Украина Миллий коррупцияга қарши кураш бюроси (МКҚК) ва Ихтисослаштирилган коррупцияга қарши кураш прокуратураси энергетика соҳасида «Мидас» операциясини ўтказганини эълон қилди. Тергов 100 миллион доллар миқдоридаги маблағни ўзлаштириш схемаси аниқлангани ҳақида хабар берди. Тергов доирасида Украинанинг бир қатор юқори лавозимли шахсларига айблов эълон қилинмоқда.

МКҚК детективлар бўлими раҳбари Александр Абакумов Киев тадбиркорни экстрадиция қилишга интилаётганини тасдиқлади.

«Уни қайтариш учун барча чораларни кўрамиз», - деди у «Украинская правда» нашрининг YouTube каналига берган интервюсида.

Абакумов идорада бундай тартиб-қоидалар бўйича тажриба мавжудлигини таъкидлади. Олий Рада депутати Ярослав Железняк ҳам Миндич ҳозирда Исроилда эканини маълум қилди.

Украина ОАВ маълумотларига кўра, Миндич Украинани Исроил паспорти билан тарк этган.

Унинг кетгани ҳақидаги хабар тарқалгач, Зеленский адлия вазири Герман Галушенко ва энергетика вазири Светлана Гринчукнинг истеъфосини талаб қилди. Иккала амалдор ҳам ишдан бўшаш тўғрисида ариза топширди. Шунингдек, Зеленский Миндичга нисбатан санкциялар жорий этди.

Коррупцияга қарши курашиш маркази украиналик фаоли Татяна Шевчукнинг айтишича, янги маълумотлар экспертлар доирасида узоқ вақтдан бери муҳокама қилинаётган шубҳаларни тасдиқлайди, холос.

«Илгари миш-миш бўлган нарса энди фактлар билан исботланмоқда», - деди у.