Америка аэропортида турист сўнгги 10 долларини сарфлаб, миллионерга айланди

Американинг Лас-Вегас аэропортида сайёҳга ажойиб омад кулиб боқди. У сўнгги 10 долларини ўйин автоматига тикиб, 3,3 миллион долларлик жекпотни ютиб олди. Бу ҳақда «Fox News» хабар берди.

Ҳодиса 28-июнь куни содир бўлган. Эркакнинг сўзларига кўра, унинг атиги 10 доллари қолган эди. Парвоздан олдин қаҳва сотиб олиш ўрнига, у омадини синаб кўришга қарор қилди ва «Fortune Wheel» ўйин автоматида ўйнади. Унинг биттагина қарори ўзига катта омад келтирди.

Ютуқ расман Лас-Вегас халқаро аэропорти маъмурияти ҳамда ўйин автомати ишлаб чиқарувчиси International Game Technology томонидан тасдиқланди.

Унинг бу омадли воқеаси нафақат кўп миллион долларлик жекпотни ютиш билан аҳамиятли бўлди. Лас-Вегас жойлашган Невада штатида жисмоний шахсларнинг даромадлари ёки қимор ўйинларидаги ютуқлардан солиқ олинмайди. Шунинг учун, ғолиб 3,3 миллион долларга қўшимча солиқ тўлаши шарт эмас.

Шу билан бирга, Лас-Вегас аэропортида бундай ҳолат илгари ҳам бир неча марта кузатилган. 2025-йил май ойида яна бир йўловчи худди шу ўйин автоматига атиги 5 доллар тикиб, 1,8 миллион доллардан ортиқ маблағни ютиб олган. Яна бир шунга ўхшаш ҳолат 2023-йилда юз берган. Ўшанда бир аёл кутиш вақтида 643 минг 435 долларлик жекпот соҳиби бўлган.

Америка аэропортлари тарихидаги энг йирик ютуқ эса 2010-йилда Рено–Тахо аэропортида қайд этилган. Ўшанда ўйинчи «Megabucks» ўйин автоматида 10,4 миллион долларлик бўлганди.