Банклар энди кредит учун карталардаги пулни тўлиқ ечиб ололмайди
2027-йилдан банклар кредит тўловларини автоматик ечиб олишда мижоз карталарида муайян миқдорда маблағ қолдириши шарт бўлади.
Ўзбекистонда тижорат банкларининг кредит ва кафиллик тўловларини мижознинг алоҳида топшириғисиз банк карталаридан автоматик ечиб олишига чеклов жорий этилади. Бу Марказий банк бошқарувининг қарорида белгиланган.
Қарор билан банк хизматлари истеъмолчилари билан муносабатларда тижорат банклари фаолиятига қўйиладиган минимал талаблар тўғрисидаги низомга қўшимча киритилмоқда.
Янги талабга кўра, банклар кредит ёки кафиллик тўловларини шартнома асосида автоматик ундирганда мижознинг барча банк карталарида жами меҳнатга ҳақ тўлашнинг энг кам миқдорининг ярмига тенг маблағни сақлаб қолиши керак. Ҳозирда бу сумма 680 минг сўмни ташкил этади. Демак, банк кредит тўловини автоматик ечиб олганидан кейин мижознинг барча карталаридаги жами қолдиқ белгиланган миқдордан кам бўлмаслиги лозим.
Қачон кучга киради?
Марказий банк қарори расмий эълон қилинган кундан уч ой ўтгач кучга киради, яъни 2027-йил 10-январдан амал қила бошлайди.
Эслатиб ўтамиз, аввалроқ Марказий банк банклардан омонат шартномаларида истеъмолчи ҳуқуқларини чекловчи шартларни бартараф этишни талаб қилганди.
