«Док-1 Макс» жабрланувчиларига компенсациянинг қолган қисми давлат бюджетидан тўлаб берилди — ССВ
Вазирлик банк карталари билан боғлиқ техник масалалар ҳал этилгандан сўнг 2 боланинг оила аъзоларига ҳам қолган 2 миллиард сўм тўлиқ тўлаб берилишини маълум қилди.
© Ijtimoiy tarmoqlar«Док-1 Макс» иши бўйича жабрланган болаларнинг оила аъзоларига бир неча йилдан буён тўланмай келган компенсациянинг қолган қисми тўлаб берилди. Бу ҳақда Соғлиқни сақлаш вазирлиги расмий баёнот берди.
Тошкент шаҳар Жиноят ишлари бўйича судининг ижро ҳужжатларига кўра, «Док-1 Макс» ва «Амбронол» дори воситалари истеъмоли оқибатида жабрланган оилаларга Мажбурий ижро бюроси томонидан 90 нафар жабрланувчи фойдасига жами 82 миллиард сўм компенсация тўлови ундирилиши белгиланган эди. Бироқ вазирликнинг айтишича, айбдорларнинг хатланган мол-мулкини сотиш жараёни белгиланган муддатдан чўзилгани сабабли бугунги кунга қадар ушбу маблағнинг 20 фоизи, яъни 16,8 миллиард сўм тўланган, холос. Компенсациянинг қолган қисми эса бир неча йилдан буён тўланмай келган.
Қайд этилишича, президент томонидан жабрланган оилаларга етказилган моддий ва маънавий зарарни тўлиқ қоплаб бериш ишларини тезлаштириш бўйича тегишли топшириқ берилди. Шунга асосан давлат бюджетидан 65,2 миллиард сўм ажратилган.
Шу тариқа бугунга қадар 88 жабрланувчига жами 80 миллиард сўм, шу жумладан, вафот этган 72 боланинг оилаларига 72,2 миллиард сўм, даволанган ва даволанаётган 16 боланинг оилаларига эса 7,8 миллиард сўм тўланган.
ССВ банк карталари билан боғлиқ техник масалалар ҳал этилгандан сўнг 2 нафар боланинг оила аъзоларига ҳам қолган 2 миллиард сўм тўлиқ тўлаб берилишини маълум қилди.
Бюджетдан ажратилган 65,2 миллиард сўм маблағ айбдор шахсларнинг мол-мулкини сотишдан тушган ва улардан ундирилган маблағ ҳисобидан республика бюджетига қайтарилади.
«Айни пайтда Соғлиқни сақлаш вазирлиги, тегишли давлат ташкилотлари ва идоралари масъуллари республика тиббиёт марказлари шифокорлари билан биргаликда жабрланган оилаларнинг ҳолидан хабар олиб, болаларга қўшимча зарур тиббий ва психологик ёрдам кўрсатиш чораларини кўрмоқда», — дейилади баёнот матнида.
«Док-1 Макс» фожиаси ва суд жараёнлари
Ҳиндистоннинг «Marion Biotech» компанияси ишлаб чиқарган ва «Quramax Medical» МЧЖ орқали Ўзбекистонга келтирилган «Док-1 Макс» ҳамда «Амбронол» йўтал сироплари 2022-йилнинг куз-қиш ойларида оммавий заҳарланишларга сабаб бўлган эди. Таркибида заҳарли этиленгликол ва диэтиленгликоль моддалари аниқланган мазкур дорилар оқибатида 68 бола вафот этгани ва 18 нафари оғир даражадаги ногиронлик орттиргани суд ҳукми билан тасдиқланган, кейинроқ 2024-йил 18-ноябрда Учтепа туман суди қарори билан яна 5 бола (жумладан, Мансурбек Кемамов) расман жабрланувчилар рўйхатига қўшилган.
Кенг кўламли тергов ва суд ишлари якунида жами 23 нафар шахс жиноий жавобгарликка тортилди. Жумладан, Фармацевтика тармоғини ривожлантириш агентлигининг собиқ директори Сардор Кариев 18 йилга, «Quramax Medical» корхонасининг собиқ раҳбари Сингҳ Рагҳвендра Пратар эса 20 йилга озодликдан маҳрум этилиб, ушбу судланганларнинг мол-мулклари хатланди ҳамда жабрланувчиларга товон пулларини тўлаш мақсадида сотувга қўйилди.
Суд ҳукмига кўра, айбдорлардан вафот этган болаларнинг оилаларига 1 миллиард сўмдан, ногиронлик орттирганларга эса соғлиғини тиклаш учун 200 миллион сўмдан 1 миллиард сўмгача компенсация ундирилиши белгиланган эди. Бироқ, тўловлар фақат хатланган мол-мулкларни сотиш ҳисобидан амалга оширилгани сабабли, жараён 3 йилга чўзилди ва оғир аҳволдаги фарзандларининг муолажалари учун маблағ тополмаган ота-оналар турли инстанцияларга, хусусан, 2025-йилнинг октябр ойида давлат раҳбарига ҳам мурожаат қилишга мажбур бўлди.
