Дренажга ажратилган маблағни ҳеч ким еб кетмаётганини кўрсатаман – Тошкент ҳокими

Президент Шавкат Мирзиёев 2024-йилнинг 21-октябрь куни ўз раислигида ўтказилган «Яшил макон» умуммиллий лойиҳаси доирасида амалга оширилган ишлар натижадорлиги ва келгусидаги устувор вазифалар юзасидан видеоселектор йиғилишда Тошкент шаҳридаги дренаж тизимини танқид қилганди. Эртаси куни, яъни 2024-йил 22-октябрда Тошкент шаҳар ҳокимининг қарори билан ёғингарчиликда сув тошқинлари билан боғлиқ қурилиш-таъмирлаш ишлари учун «Ягона буюртмачи хизмати» инжиниринг компаниясига 6 млрд сўм йўналтирилиши белгиланди.

Бироқ орадан икки йил ўтиб, жорий йил 3-май куни шаҳардаги Чорсу метро бекати ёнида содир бўлган ҳолат юқоридаги ишлар бўйича саволларни келтириб чиқаргани ҳам рост. VAQT.UZ журналисти ушбу масала бўйича шаҳар ҳокими Шавкат Умурзоқовнинг фикри билан қизиқди.
 
Чорсудаги ҳолатнинг сабаби

«Чорсуда сув тошганининг сабаби, у ерда давлатда айби бор, қарамаганлиги. Мана ундан кейин яна ёмғир ёғди, нега сув тошмади? Нима деб ўйлайсиз? Чунки ариғини очиб қўйдик. Ариқ очиқ эди, ундан олдин ёмғир ёғганда тошмаган. Ариқни ёпиб қўйишди-да. Ариқни ёпиб қўйгандан кейин сув тошди. Яна очиб қўйдик, яна сув тизими ишлаб кетди», – деди шаҳар ҳокими.

Шавкат Умурзоқов Тошкент шаҳри сув тизимини бошқарадиган марказ ташкил қилиш бўйича президентга таклиф киритганини айтди. Шунингдек, ҳоким яқинда шу масалада Хитойга бориб, 400 миллион долларга инвестиция жалб қилиш бўйича келишиб келганини қўшимча қилди.

«Тан олишимиз керак, сиздан ҳозир сўрасам ёки кимдандир сўрасам, бугун январ ойида қанча сув тушади-ю, қаерга боради-ю ёки феврал ойида қанча-ю ва қанча сув сарфи қаерга сарфлашимиз керак дейдиган бизда ягона рақамлашган, баланс чиқарилган тизим мавжуд эмас. Ҳозир шунинг устида ишлаяпмиз. Буни қиламиз. Мана «Tianjin Urban Construction» компанияси жуда катта тажрибага эга. Хитойнинг деярли 50 фоиздан ошиқ дренаж системасини қилган компанияни жалб қилганмиз. Ва у сувни қаергадир, дарёга оқизиб юбориш эмас, аксинча, уни техник сув қилиб, қайтиб поливка бериш механизмини жорий қиляпмиз. Бу Сингапур ва Дубайнинг тажрибаси. Кимда нима танқис бўлса, ўшанда тажриба бор. Шу тажрибани оляпмиз», – дейди ҳоким.

 
Маблағ тақсимланиши
 
VAQT.UZ журналисти бундан 2 йил олдин ҳоким қарори билан ажратилган 6 миллиард сўм маблағнинг тақсимланиш жараёнига ҳам қизиқди ва ҳокимдан ушбу маблағнинг бошқа чўнтакларга ўтиб кетиш ҳолати учраган ёки йўқлигини сўради. Умурзоқовнинг жавоби эса қуйидагича бўлди:

«Ҳозир тан олайлик, ёмғир ёғганда сув кўп жойда тошаётган эди. Ҳозир кескин қисқарган. Ҳозир мана бу охирги тошганининг сабаби, мен энди ёмғир кўп ёғиб кетди демайман. Мен ҳар битта танқидни танқидий қараб туриб, қилган ишим нима бўлди, биласизми? Ўша ерда мавжуд, ҳар доим ишлаб турган, сувни тортиб оладиган моторлар бор. Шунинг қувватини икки баробарга оширдим ҳозир. Олдин етаётган эди. Совет, эски, нима дейди, ўша мотор тизими эди. Мен алиштирмаган эдим, чунки комплекс, ҳозир айтган 400 миллион доллар доирасида қилардик бу нарсани. Ҳозир майли, уни кутмадик-да, чуқурлашган жойларни аниқладик шаҳар бўйича. Ҳаммасини икки баробарга шу сувни тортиб олиш қувватини оширишга маблағ ажратиб, ҳозир уни алиштириб ташлаймиз. Худо хоҳласа, мана кейинги туманга чиқаришимизга мен илтимос қилардим, мана ҳозир мутасадди, мен ходимларимнинг ҳаммасини кўрсатиб, эга кесиби билан ҳеч ким еб кетмаётганлигини кўрсатиб бераман».