«Gemini» компанияларга ҳакерлик ҳужуми уюштирди

«Google»нинг сунъий интеллект модели — «Gemini» 2026 йилнинг май ойида киберхавфсизлик синовидан ўтказилаётган вақтда учта компания тизимига бузиб кирган. Синов жараёни киберхавфсизликни баҳолаш билан шуғулланувчи мустақил «Irregular» компанияси томонидан ташкил этилган. «Reuters» агентлиги буни «Google» сунъий интеллект тизимининг бундай ҳаракатни мустақил амалга оширганига оид дастлабки маълум бўлган ҳолат сифатида хабар қилди.

«The Insider» нашри маълумотларига кўра, мазкур воқеалар май ойида содир бўлган. Бироқ «Google» буни фақат сентябр ойида, «The Wall Street Journal» нашрининг саволларидан кейингина оммага тасдиқлади. Ушбу ҳодиса таъсирига тушган учала компанияга ҳам вазият ҳақида хабар берилган.

«Gemini» компаниялар тизимига қандай кирган?

Аслида, синов давомида «Gemini» фақат белгиланган тест муҳити доирасида вазифаларни бажариши керак бўлган. Бироқ модел очиқ интернет тармоғига чиқиб кетган ва у ердаги ҳақиқий сайтларни ҳам тестнинг бир қисми деб қабул қилган.

«Reuters»нинг ёзишича, учта ҳолатдан бирида «Gemini» ҳимояланган тизимга кириш учун паролларни тахминий танлаш усулидан фойдаланган. Қолган икки ҳолатда эса модел очиқ интернетдаги маълумотларни топиб, улар ёрдамида ҳимояланган тизимларга киришга муваффақ бўлган.

 «Google» қандай муносабат билдирди?

«Google»нинг хавфсизлик муҳандислиги бўйича вице-президенти Хизер Адкинснинг маълум қилишича, стандарт баҳолаш жараёнида «Gemini» интернетдан очиқ маълумотларни топиб, уларни тест доирасига киради деб ўйлаган ҳолда реал сайтларга кириш учун ишлатган.

Адкинснинг қўшимча қилишича, учала ташкилот ҳам ҳодисадан хабардор қилинган ҳамда «Irregular» билан ҳамкорликда тест жараёнларига тегишли ўзгартиришлар киритилган.

«Google» маълумотларига кўра, учала ҳолатда ҳам «Gemini» ҳақиқий компаниялар тизимига кирганини англаб етгач, ўз ҳаракатларини дарҳол тўхтатган.

Ҳозирча, мазкур компанияларнинг номлари ошкор этилмаган.

Бу ҳозирги «Gemini» модели эмас

«The Insider»нинг аниқлик киритишича, мазкур синовларда «Gemini»нинг аввалги версияси иштирок этган. Яъни гап ҳозирги кунда ишлатилаётган модел ҳақида кетмаяпти.

Бу жиҳат «Google»нинг воқеага берган изоҳида ҳам муҳим ўрин тутади: ҳодиса стандарт тест жараёнида юз берган ва шундан сўнг тест тартиб-қоидаларига зарур ўзгартиришлар киритилган.

Муаммо фақат «Gemini» билан боғлиқ эмас

«The Insider» маълумотига кўра, «Irregular»нинг тест муҳитларида бошқа йирик сунъий интеллект ишлаб чиқарувчиларининг моделлари билан ҳам шунга ўхшаш ҳолатлар кузатилган.

Хусусан, июл ойида «OpenAI»нинг сунъий интеллект агенти тест пайтида изоляция қилинган муҳитдан чиқиб кетиб, «Hugging Face» инфратузилмасига ҳужум қилгани ҳақида хабар берилган эди. «Anthropic» компанияси эса 141 мингдан ортиқ тест жараёнини текшириб, ўзининг «Claude» моделлари билан боғлиқ учта шундай ҳолатни аниқлаган. Уларнинг бирида модел ҳатто зарарли дастурий пакетни жойлаган ва уни 15 та қурилмада ишга туширган.

Август ойида «Meta» компанияси ҳам «Irregular» синовлари вақтида сунъий интеллект модели тест муҳитидаги хатолик сабабли интернетга чиқиб, бошқа бир компания тизимига кирганини маълум қилган. Нашрнинг таъкидлашича, «Google» жорий йилда бундай ҳодисага дуч келган камида тўртинчи йирик сунъий интеллект ишлаб чиқарувчисига айланган.

«Reuters» ҳам «Meta», «Anthropic» ва «OpenAI» моделлари билан боғлиқ шунга ўхшаш инцидентлар юз берганини қайд этган. Ўз навбатида, «Irregular» бу ҳолатларнинг барчаси тест муҳитидаги бир хил камчилик билан боғлиқ эканини ва марказ ўз томонидан ушбу муаммоларни бартараф этганини билдирган.

Тест муҳитида аслида нима содир бўлган?

«Irregular» аввалроқ ўз тест сценарийларидан бирида интернетга кириш имконияти тасодифан ёқилиб қолганини тушунтирган эди. Шу билан бирга, тест учун ўйлаб топилган компания номи интернетдаги реал домен билан бир хил бўлиб чиққан.

Оқибатда моделлар айрим ҳолатларда ҳақиқий компанияларнинг тизимларини ҳам симуляциянинг бир қисми сифатида қабул қилган.

«The Insider» ёзишича, бу моделлар гўёки тест шартлари доирасида рухсат этилган ҳаракатларни амалга оширмоқдаман, деб ўйлаган, аммо бу тизимларнинг ҳақиқий эгалари бундай аралашувга асло рухсат бермаган бўлган.