Геосиёсий кескинлик фонида биткоин нархи ўсмоқда

28-февралдан 6-мартгача бўлган даврда биткоин нархи 7,2 фоизгача ўсди. Бу ўсиш АҚШ ва Исроилнинг Эронга қарши бошлаган ҳарбий амалиётлари ортидан кучайган геосиёсий ноаниқликлар фонида кузатилди.

6-март куни 10:00 ҳолатига, фонд бозорида биткоин нархи 70 611 доллар атрофида савдолашмоқда.

Исроил-Эрон кескинлашувининг криптобозорга таъсири

АҚШ ва Исроилнинг Эрон ҳудудига берган зарбаларидан кейин мамлакат криптовалюта бозорида кескин ҳаракат кузатилди. Блокчейн таҳлил компаниялари маълумотларига кўра, зарбалар бошланганидан кейинги соатларда Эрон криптобиржаларидан миллионлаб долларлик активлар чиқиб кетган.

Chainalysis компанияси маълумотларига кўра, ҳужумлар бошланганидан кейин бир соат ичида Эрон криптобиржаларидан чиқиб кетган маблағлар ҳажми 2 миллион доллардан ошган. 28-февралдан 2-март кунигача бўлган даврда эса Эрон криптобиржаларидан жами 10,3 миллион доллар миқдоридаги криптовалюта чиқиб кетган. Бироқ транзаксиялар ким томонидан амалга оширилгани ва уларнинг аниқ мақсади маълум эмас.

Британиялик блокчейн таҳлил компанияси Elliptic эса Эроннинг энг йирик криптобиржаларидан бири бўлган «Nobitex» платформасидаги маблағлар ҳаракати кескин ошганини қайд этган. Тадқиқотларга кўра, 28-февраль куни соат 11:00–12:00 оралиғида ушбу биржадан чиқиб кетган маблағлар 2,89 миллион долларга етган.

Таҳлилчиларнинг фикрича, ушбу маблағлар ҳаракати бир нечта омиллар билан боғлиқ бўлиши мумкин. Масалан, айрим ҳолатларда оддий фуқаролар хавф ортиши фонида ўз активларини бошқа платформаларга ўтказиши мумкин. Бошқа ҳолларда эса криптобиржалар ликвидликни қайта тақсимлаш ёки операцияларни камроқ кўринувчан қилиш учун маблағларни ҳаракатлантириши эҳтимолдан холи эмас.