Ҳиндистон Россиядан нефт сотиб олишни тиклади

Йил бошида Россиядан нефт импортини кескин камайтирган Ҳиндистон, Яқин Шарқдаги кескинлик фонида харидларни яна оширмоқда. «Bloomberg» агентлиги маълумотларига кўра, илгари Жанубий-Шарқий Осиёга йўналтирилган Россия хомашёси бўлган камида учта танкер йўналишини кескин ўзгартириб, Ҳиндистон портлари томон йўл олган.

Умумий ҳисобда «Odune», «Matari» ва «Indri» кемалари қарийб 2,16 млн баррел «Urals» маркали нефтини ташимоқда. «Odune» танкери мамлакат шарқий қирғоғидаги Парадип портига кириб бўлди, «Matari» кемаси пайшанба куни Вадинар портида кутилмоқда, илгари Сингапур томон ҳаракатланаётгани ҳақида хабар берган «Indri» эса Ҳиндистон томон бурилди. Ушбу учта танкер Буюк Британия ва Европа Иттифоқи санкциялари остидадир.

Аввалроқ, Россиядан Ҳиндистонга нефт импорти ўтган ёздаги суткасига 2 млн баррелдан 2026 йилнинг февралида 1,1 млн баррелгача тушиб кетган эди. Таҳлилчилар Вашингтон босими туфайли бу кўрсаткич яна 400–600 минг баррелгача камайишини прогноз қилишган эди.

Феврал ойида президент Доналд Трамп билан тузилган савдо келишуви доирасида Деҳли Ҳиндистон товарларига қўйилган 25 фоизлик божнинг бекор қилиниши эвазига «Роснефт» ва «Лукойл»дан харидларни тўхтатиш мажбуриятини олган эди.

Бироқ бўғозида кемалар қатновининг тўхташи ва бу йил Ҳиндистонга нефт экспорти бўйича етакчига айланган Саудия Арабистонидан етказиб беришдаги узилишлар Деҳлини стратегиясини қайта кўриб чиқишга мажбур қилмоқда.

Экспертларнинг таъкидлашича, асосий сув артериясининг тўсилиб қолиши Россия нефтини мамлакат энергетика хавфсизлигини таъминлаш учун деярли ягона муқобил вариантига айлантирмоқда.

Шунга қарамай, Россиядан импортнинг тикланиши АҚШ билан савдо келишувларини хавф остига қўйиши мумкин. Трамп администрацияси аввалроқ етказиб беришни назорат қилиш учун махсус панел тузган ва Москвадан харидлар тикланган тақдирда жарима божлари зудлик билан қайта тикланиши мумкинлиги ҳақида огоҳлантирган эди.