Каспий ости кабели: Туркманистон энергетика лойиҳасида иштирок этиши мумкин

Туркманистон электр энергиясини экспорт қилиш учун Каспий денгизи туби орқали энергетика кабели ётқизиш лойиҳасида иштирок этиш имкониятини ўрганмоқда. Бу ҳақда 18-май куни WUF13 форуми доирасида Туркманистон Энергетика вазирлиги ҳузуридаги «Туркменэнерго» ташқи иқтисодий алоқалар ва экспорт бўлими катта ходими Абдулла Жалиловга таяниб, «Report» агентлиги маълум қилди.

Унинг сўзларига кўра, Туркманистон шу билан бир вақтда Туркменбоши шаҳрида қуввати 1574 МВт бўлган комбинирланган циклли электр станцияси қурилишини ҳам амалга оширмоқда. Келажакда ушбу станция экспорт учун асосий электр энергияси манбасига айланиши мумкин.

«Биз Каспий денгизи туби орқали кабел ётқизиш масаласини ўрганяпмиз. Айни пайтда Туркменбошида қуввати 1574 МВт бўлган комбинирланган циклли электр станцияси қурилмоқда. У қуриб битказилгандан кейин ушбу станция орқали ва Каспий денгизи тубидаги кабел орқали электр энергиясини Озарбайжонга ёки у ердан бошқа давлатларга экспорт қилиш мумкин бўлади», – деди у.

Озарбайжон электр энергияси учун транзит

Абдулла Жалиловнинг таъкидлашича, мазкур масала Озарбайжон ва Туркманистон ўртасидаги ҳукуматлараро комиссиялар доирасида мунтазам муҳокама қилиб келинмоқда, аммо ҳозирча якуний қарор қабул қилинмаган.

«Ҳозирча бу масала очиқ қолмоқда. Лекин биз ушбу лойиҳани амалга оширишни истаймиз», – дея қўшимча қилди у.

«Туркменэнерго» вакили сўзларига кўра, лойиҳа барча иштирокчилар учун иқтисодий жиҳатдан манфаатли бўлиши мумкин. Бунда Озарбайжон электр энергиясини бошқа давлатларга экспорт қилиш учун муҳим транзит мамлакат сифатида қаралмоқда.