my.gov.uz saytini soxtalashtirish orqali pul o‘g‘irlaganlar aniqlandi

Ichki ishlar vazirligi Kiberxavfsizlik markazi 456 nafar fuqaroning bank hisoblaridan 1 milliard so‘mdan ortiq mablag‘ni talon-toroj qilishda gumonlanayotgan jinoiy guruh faoliyatiga chek qo‘yilganini ma’lum qildi.

Tergov ma’lumotlariga ko‘ra, jinoiy sxemani Xorazm viloyatida tug‘ilgan 33 yoshli shaxs tashkil etgan. U Yagona interaktiv davlat xizmatlari portali — my.gov.uz'ning soxta nusxasini yaratib, Instagram orqali davlat tomonidan kompensatsiya va ijtimoiy nafaqalar ajratilishi haqidagi yolg‘on reklama tarqatgan. Ishonch uyg‘otish maqsadida «Moliya vazirligi» nomi ham qo‘llangan.

Fuqarolarga bank kartasiga avtomatik ravishda qariyb 30 mln so‘m o‘tkazib berilishi va’da qilingan. Buning uchun ulardan soxta sayt orqali anketa to‘ldirish va bank kartasi ma’lumotlarini kiritish talab etilgan.

Drop-kartalar va kriptovalyuta

Tergov jarayonida jinoiy sxemaga 20–24 yoshli yoshlar ham jalb qilingani aniqlangan. Ular 26 nafar shaxs nomiga rasmiylashtirilgan 293 ta drop-kartani guruh ixtiyoriga bergan.

Fuqarolar hisobidan o‘g‘irlangan mablag‘lar dastlab ushbu kartalarga o‘tkazilgan. Keyin esa ularning kelib chiqish manbasini yashirish maqsadida kriptovalyutaga aylantirilgan.

Huquqni muhofaza qiluvchi organlar bu sxemada kiberfiribgarlik bilan bir qatorda jinoiy daromadlarni legallashtirish alomatlari ham mavjudligini ta’kidlamoqda.

Jinoyat ishi qo‘zg‘atildi

Mazkur holat yuzasidan gumonlanuvchilarga nisbatan Jinoyat kodeksining 168-moddasi (firibgarlik) hamda 278−6-moddasi (zarar keltiruvchi dasturlarni yaratish, ishlatish yoki tarqatish) bilan jinoyat ishi qo‘zg‘atilgan.

Hozirda tergov harakatlari davom etmoqda.

Kiberxavfsizlik markazi fuqarolarni davlat xizmatlari va ijtimoiy to‘lovlar haqidagi xabarlarni faqat rasmiy manbalar orqali tekshirishga, shaxsiy va bank ma’lumotlarini noma’lum saytlarga kiritmaslikka chaqirmoqda.

So‘nggi yillarda fishing saytlari va soxta davlat xizmatlari platformalari orqali amalga oshirilayotgan kiberfiribgarlik holatlari ko‘paymoqda. Mutaxassislar har qanday kompensatsiya yoki to‘lov haqidagi takliflarga ishonishdan oldin veb-manzilning haqiqiyligini tekshirishni tavsiya qiladi.