Немис авиакомпанияси ёқилғини тежаш учун 20 минг рейсни бекор қилади
Қарор Яқин Шарқдаги можаро ортидан юзага келган энергия инқирози ва авиаёқилғи нархларининг ўсиши билан боғлиқ.
© wikimedia commonsГерманиянинг миллий авиакомпанияси «Lufthansa» 2026-йил июндан октябргача бўлган даврда 20 минг рейсни бекор қилишини маълум қилди. Бу қарор АҚШ ва Исроилнинг Эрон билан боғлиқ уруши ортидан юзага келган энергия ресурслари инқирози шароитида авиаёқилғини тежаш мақсадида қабул қилинган. Бу ҳақда 21-апрель куни Европа қитъасидаги энг йирик авиакомпаниялардан бири тарқатган матбуот баёнотида айтилган.
Сабаб нима?
«Lufthansa» вакилларига кўра, ушбу рейсларни бекор қилиш орқали 40 минг тоннадан ортиқ авиаёқилғини тежаш мумкин бўлади. Шу билан бирга, авиакомпания самарадорлиги (йўловчи-километрлар билан ўлчанади) 1 фоиздан камроққа пасаяди.
Бунга қуйидаги чоралар орқали эришиш режалаштирилган:
— Франкфурт ам Майн ва Мюнхендан амалга ошириладиган қисқа масофали, рентабеллиги паст рейсларни қисқартириш
— шу билан бирга Цюрих, Виена ва Брюсселдан мавжуд рейсларни кенгайтириш
Ўзгаришлар компаниянинг олтинчи хаби – Римни ҳам қамраб олади.
Қайси рейслар июндан октябргача бекор қилиниши апрел охирида эълон қилинади. Шу билан бирга, компания 31-майгача режалаштирилган парвозларни ҳам аллақачон қисқартиришни бошлаган. Масалан, 20-апрель куни «Lufthansa» кунига 120 та рейсни бекор қилди. Жумладан, Франкфурт ам Майндан Бидгош, Жешув ва Ставангер шаҳарларига парвозлар вақтинча тўхтатилди.
Бошқа авиакомпаниялар ҳам рейсларни бекор қилмоқда
«Lufthansa» ягона эмас – Яқин Шарқдаги беқарорлик ва энергия нархларининг ўсиши бошқа авиакомпанияларни ҳам шундай чоралар кўришга мажбур қилмоқда.
Жумладан, Стокголмда жойлашган «Scandinavian Airlines» апрел ойида тахминан 1000 та рейсни бекор қилишини маълум қилди. Франция-Нидерландия гуруҳи «Air France-KLM» эса узоқ масофали парвозлар учун (жумладан аллақачон сотилган билетларга ҳам) 100 еврогача қўшимча тўлов жорий қилди.
Шунингдек, ёқилғи муаммолари сабаб «FlyOne» ҳам айрим парвозларни бекор қилганини маълум қилди.
Европа Комиссияси бугун, 22-апрел куни Яқин Шарқдаги уруш оқибатида юзага келган энергетика инқирозини ҳал қилиш бўйича режасини тақдим этиши кутилмоқда.
