Оқ уй Трамп номзодини расман Нобел тинчлик мукофотига илгари сурди
АҚШ президенти Доналд Трамп «тинчлик президенти» сифатида бир қатор мамлакат раҳбарлари ва ҳукуматлари қўллаб-қувватлаган ҳолда Нобел мукофотига тавсия этилди.
Оқ уй АҚШ президенти Доналд Трамп номзодини Нобел тинчлик мукофотига расман илгари сурганини маълум қилди. Расмий баёнотда Трамп «тинчлик президенти» сифатида таърифланди.
Трамп номзодлигини қўллаб-қувватлаганлар орасида Озарбойжон президенти Илҳом Алиев, Арманистон бош вазири Никол Пашинян, Камбоджа бош вазири Ҳун Манет, Габон президенти Брис Олиги Нгема, Исроил бош вазири Бинямин Нетаняҳу, Покистон ҳукумати ва Руанда ташқи ишлар вазири Оливие Ндуҳунгире бор.
Ўтган ой Покистон Трампни Ҳиндистон билан низони ҳал этишга кўрсатган саъй-ҳаракатлари учун Нобель мукофотига тавсия қилишини билдирган эди. Орадан кўп ўтмай, Исроил бош вазири Бинямин Нетаняҳу ҳам унинг номзодини расман илгари сурганини маълум қилди.
Август бошида эса Камбоджа ҳам Трамп номзодини қўллаб-қувватлаш ниятини эълон қилган. Оқ уй баёнотига кўра, ушбу қўллаб-қувватлашлар АҚШ президентининг халқаро тинчлик ва дипломатиядаги саъй-ҳаракатларига берилган юқори баҳони англатади.
Нобел тинчлик мукофоти ҳар йили халқаро муносабатларда тинчликка ҳисса қўшган шахслар ва ташкилотларга берилади. Ғолиб номи октябр ойида эълон қилиниши кутилмоқда.
