Ўзбекистонга келмоқчи бўлган Трамп, газсиз ҳудудларда 350 кВт га оширилган «свет» лимити ва 100 минг доллар пора билан ушланган банкир — 6 октябрь дайжести

Трамп Ўзбекистонга келмоқчи

АҚШ президенти Дональд Трамп Ўзбекистонга ташриф буюришни режалаштирмоқда. Унинг дўсти ва савдо вакили Паоло Замполлининг таъкидлашича, ҳозирча ташрифнинг аниқ санаси йўқ, бироқ икки давлат раҳбарлари ўртасида илиқ ва дўстона муносабатлар шаклланган. Бунинг мантиқий давоми сифатида, яқинда Президент администрацияси раҳбари Саида Мирзиёеванинг Вашингтонда Трамп билан учрашгани қайд этилган. Марказий Осиё билан, хусусан, стратегик ресурслар бўйича алоқаларни кучайтираётган АҚШ октябрь ўрталарида Самарқандда ўтадиган «C5+1» учрашувига Давлат котиби Марко Рубио бошчилигидаги 100 кишилик йирик савдо делегациясини юбормоқда.

Мазкур учрашув минтақадаги савдо имкониятларини кенгайтириш ва янги шартномалар тузишга қаратилган. Жумладан, АҚШ Ўзбекистоннинг йирик авиация марказига айланиш режаларини қўллаб-қувватламоқда ва шу доирада мамлакат 2025 йилда 22 та «Boeing 777 Dreamliner» самолётини харид қилишга келишган. Бундан ташқари, қишлоқ хўжалиги ва озиқ-овқат йўналишидаги Американинг йирик «Cargill» компанияси Ўзбекистонга 6 миллиард долларгача сармоя киритиши мумкинлиги кутилмоқда.

100 минг доллар пора олган банк ходими қўлга олинди

Тошкент вилоятида банкнинг минтақавий маркази бўлим бошлиғи харидорга ер майдонларини олиб бериш эвазига жами 4 миллион 250 минг АҚШ доллари талаб қилган. У Қуйичирчиқ туманида ўз отасига ижарага берилган 16,05 гектар ва ҳокимлик захирасидаги 4 гектар ерни мансабдор танишлари орқали ноқонуний расмийлаштириб беришни ваъда қилган.

Ушбу шахс тезкор тадбир давомида сўралган маблағ ҳисобидан 100 минг АҚШ долларини олдиндан пора сифатида олаётган вақтида ашёвий далиллар билан ушланди. Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.

Ўзбекистон ТИВ Латвиянинг виза чекловлари бўйича изоҳ берди

Латвия Ички ишлар вазири айрим ўзбекистонликлар томонидан содир этилган ҳуқуқбузарликлар, хусусан, вояга етмаганларга қарши жиноятлар сабабли Ўзбекистон фуқароларига виза беришни вақтинча тўхтатишни таклиф қилган эди. Бунга жавобан Ўзбекистон Ташқи ишлар вазирлиги зудлик билан дипломатик чоралар кўриб, Латвия расмийлари билан музокаралар ўтказди. Натижада, Латвия томони мавжуд виза тартибига ўзгартириш киритишга эҳтиёж йўқлигини маълум қилди ва ушбу чеклов масаласи ҳукумат кун тартибига ҳам киритилмади.

Шу муносабат билан, Ўзбекистон ТИВ хорижга чиқаётган ёки чет элда бўлиб турган юртдошларимизни борган мамлакатларининг қонун-қоидаларига қатъий риоя қилишга ва миллий урф-одатларни ҳурмат қилишга чақирди. Вазирлик айрим шахсларнинг ноқонуний хатти-ҳаракатлари чет элда қонуний асосда ўқиётган, ишлаётган ёки яшаётган бошқа барча ватандошларимизга салбий таъсир кўрсатиши мумкинлигини таъкидлаб, уларни масъулиятли бўлишга чорлади.

Халқ банки бошқаруви раиси ўринбосари лавозимидан озод этилди

Хасанжон Ахмедов ўз аризасига биноан «Халқ банки» бошқаруви раиси ўринбосари лавозимидан озод этилди ва бошқарув аъзолигидан чиқарилди. Ушбу қарор 24 сентябрь куни банк Кузатув кенгашининг йиғилишида қабул қилинган бўлиб, у мазкур лавозимда 2025 йилнинг февралидан буён фаолият юритиб келаётган эди.

Шунингдек, сўнгги кунларда бошқа қатор давлат банкларида ҳам раҳбарият таркибида ўзгаришлар юз берди. Хусусан, сентябрь ойи давомида «Микрокредитбанк», «Туронбанк» ва «Алоқабанк» бошқаруви раиси ўринбосарлари ҳам ўз хоҳишига кўра ёки ваколатлари муддатидан олдин тугатилиб, эгаллаб турган лавозимларидан озод этилган.

Газсиз ҳудудларда электр энергиясининг базавий меъёри 350 кВт·соатга оширилади

Ўзбекистонда куз-қиш мавсумида аҳолини, айниқса, эҳтиёжманд оилаларни ижтимоий қўллаб-қувватлаш мақсадида иситиш мавсумида газлашмаган ва табиий газ етиб бормаган ҳудудларда электр энергиясининг базавий меъёри 200 киловатт-соатдан 350 киловатт-соатга оширилади. Президент Шавкат Мирзиёев иштирокидаги тақдимотда маъқулланган ушбу чоралар доирасида, шунингдек, декабрь ойида эҳтиёжманд оилаларга бир марталик моддий ёрдам ажратиш таклиф қилинди.

Бундан ташқари, эҳтиёжманд оилаларнинг коммунал харажатларини қоплашда даромад мезони 1 миллион 430 минг сўмгача оширилиб, ёрдам қамрови яна 166 минг оилага кенгайтирилади. Шу билан бирга, электр ва газ бўйича базавий меъёрдан ортиқ истеъмол харажатларининг бир қисмини қоплаш муддатини 2028 йил 1 апрелгача узайтириш ҳамда шароити оғир 3 мингта хонадонни иссиқлик жиҳатидан ҳимоялаш ва энергия тежовчи ускуналар билан таъминлаш кўзда тутилмоқда.