Россия урушга сафарбар қилганларнинг учдан икки қисми ҳалок бўлди — таҳлил

Германиядаги Халқаро хавфсизлик муаммолари институти эксперти Янис Клюге Россия федерал бюджети маълумотлари асосида ўтказган таҳлилга кўра, 2022 йилда Украинадаги уруш учун сафарбар этилган 300 минг ҳарбийнинг тахминан учдан бир қисмигина фронтда қолган.

Қайд этилишича, ойига 158 минг рубллик махсус тўлов олувчилар сони 2022–2023 йиллар кесимидаги 293 минг нафардан 2025 йил ўрталарига келиб 168,5 минг нафарга тушган. Ҳозирда эса бу кўрсаткич 100 минг нафардан бироз кўпроқ экани тахмин қилинмоқда.

Контракт имзолаганлар кўпайган

Таҳлилга кўра, сафарбар этилганлар сонининг камайиши контракт асосида хизматга жалб қилинаётганлар ҳисобига қисман қопланмоқда. Бюджетдан ажратилаётган қўшимча тўловлар асосида контрактчилар сони 2023 йилдаги 230,4 минг нафардан 2025 йилга келиб 554,8 минг нафарга етгани қайд этилган.

Натижада Россиянинг Украинадаги умумий ҳарбий гуруҳи 523,5 минг нафардан 723,4 минг нафаргача ошган.

Бироқ экспертнинг таъкидлашича, қўшинлар сони ўсиши янги аскарларни ёллаш суръатларидан анча паст, чунки армия ҳар йили фаол таркибининг деярли ярмини йўқотади.

Йўқотишлар сони юқори

Янис Клюге ҳисоб-китобларига кўра, контракт тузганлар орасидаги «доимий йўқотишлар» 2023 йилда 182,3 минг нафарни ташкил этган бўлса, 2025 йилга келиб бу кўрсаткич 251 минг нафарга етган.

Шу билан бирга, Россия ҳар йили тахминан 370–385 минг янги контракт асосидаги ҳарбийларни жалб қилаётгани айтилган.