Шавкат Мирзиёев Си Сзиньпиннинг сунъий интеллект бўйича глобал ташкилот тузиш ташаббусини қўллаб-қувватлади
Бишкекдаги ШҲТ саммитида бир нечта ҳукумат вакиллари сунъий интеллект, сув ва энергетика хавфсизлиги, транспорт ҳамда Афғонистон бўйича ҳамкорликни кучайтиришга қаратилган қатор ташаббусларини муҳокама қилди.
© president.uzШанхай ҳамкорлик ташкилоти давлат раҳбарлари кенгашининг Бишкекдаги йиғилишида сунъий интеллект, иқлим ўзгариши, транспорт ва минтақавий хавфсизлик масалалари муҳокама қилинди.
Шавкат Мирзиёев Хитой раҳбари Си Сзиньпиннинг сунъий интеллект соҳасида ҳамкорлик бўйича бутунжаҳон ташкилотини ташкил этиш ташаббусини қўллаб-қувватлади. Ўзбекистон президенти ШҲТнинг ушбу янги технологик альянс билан шериклик ўрнатишини илгари сурди.
Шунингдек, ШҲТнинг очиқ кўп тилли маълумотлар корпусини шакллантириш ва сунъий интеллект ҳамда янги рақамли ечимлар бўйича форум ўтказиш муҳимлиги таъкидланди.
Сув, озиқ-овқат ва энергетика хавфсизлиги
Иқлим ўзгариши билан боғлиқ хавф-хатарлар ортиб бораётган шароитда ШҲТ доирасида озиқ-овқат, сув ва энергетика хавфсизлиги бўйича ягона кун тартибини шакллантириш зарурлиги қайд этилди.
Бу йўналишда комплекс дастурлар, замонавий технологиялар ва илғор билимлар алмашинувини мувофиқлаштирадиган ихтисослашган механизм яратиш ташаббуси билдирилди.
Шунингдек, 2035 йилга қадар сув ва энергетика самарадорлиги соҳасида ШҲТнинг технологик ҳамкорлик дастурини ишлаб чиқиш таклиф этилди.
Халқаро транспорт йўлакларининг кенг тармоғини шакллантириш мақсадида ШҲТга аъзо давлатларнинг темир йўл маконлари интеграцияси бўйича кенгаш таъсис этиш масаласи ҳам кўтарилди.
Афғонистон бўйича мулоқот қайта тикланиши мумкин
Йиғилишда Афғонистонда тинчлик ва барқарорликни таъминлаш минтақа хавфсизлиги ва тараққиётининг асосий шартларидан бири экани таъкидланди.
Шу муносабат билан ШҲТнинг Афғонистон вакиллари билан мунтазам мулоқотини қайта тиклаш ташаббуси илгари сурилди.
Шунингдек, Тошкент шаҳрида Хавфсизликка таҳдид ва хатарларга қарши курашиш бўйича универсал марказ тўғрисидаги низомнинг қабул қилиниши ташкилот институционал ривожининг янги босқичини бошлаб бериши қайд этилди. Марказ самарали ишлаши учун зарур шарт-шароитлар яратилиши таъкидланди.
Маданий-гуманитар ҳамкорликни кучайтириш мақсадида 2028–2030 йилларга мўлжалланган анъанавий санъат ва номоддий маданий меросни асраб-авайлаш ҳамда оммалаштириш бўйича ҳамкорлик дастурини тайёрлаш ташаббуси ҳам билдирилди.
Йиғилиш якунида Шавкат Мирзиёев Покистон бош вазири Шаҳбоз Шарифни ШҲТга раисликни қабул қилиб олгани билан табриклади.
Йиғилишдан сўнг ҳужжатларни имзолаш маросими бўлиб ўтди. Хусусан, Бишкек декларацияси, 2002 йил 7 июндаги ШҲТ Хартиясига ўзгартириш ва қўшимчалар киритиш тўғрисидаги баённома ҳамда ядровий ва жисмоний ядровий хавфсизликни таъминлаш бўйича кўп томонлама шерикликни мустаҳкамлаш тўғрисидаги декларация қабул қилинди. Шунингдек, ҳамкорликнинг устувор йўналишларини янада мустаҳкамлашга қаратилган бошқа ҳужжатлар тўплами ҳам қабул қилинди.
Vaqt.uz аввалроқ айни шу саммитда Президент Мирзиёев «ШҲТ – 2040: умумий тараққиёт макони» концептуал қарашини ишлаб чиқишни таклиф қилгани ҳақида хабар берганди.
