«СҚБ» Бурак Ўзчивит учун қарийб 5 млрд сўмлик тендер эълон қилди

«Ўзсаноатқурилишбанк» томонидан бренд-амбассадорлик хизматларини ташкил этиш бўйича йирик тендер эълон қилинди. Ушбу танлов доирасида машҳур турк актёри Бурак Ўзчивитни банк бренди амбассадори сифатида жалб қилиш режалаштирилган.

Тендернинг бошланғич қиймати 4,86 млрд сўмни ташкил этади. Танлов «энг яхши таклифларни танлаш» тамойили асосида ўтказилади.

Тендер шартлари

Тендер ҳужжатларига кўра, бренд-амбассадорлик хизматлари кенг қамровли маркетинг ва PR интеграциясини ўз ичига олади. Жумладан, контент ишлаб чиқариш қисмида Бурак Ўзчивитни икки йилгача банкнинг расмий амбассадори сифатида жалб қилиш, Ўзбекистонда камида 2 та локацияда фото ва видео суратга олиш, реклама роликлари тайёрлаш ҳамда барча материалларга нисбатан эксклюзив фойдаланиш ҳуқуқини бангга ўтказиш назарда тутилган.

Шу билан бирга, актёр образидан банк карталарида фойдаланиш режалаштирилган.

Контентдан фойдаланиш ҳуқуқи тўлиқ банкка тегишли бўлиб, уни халқаро миқёсда ҳам қўллаш мумкин.

Ғолиб иштирокчи ғолиблик эълон қилинган кундан 5 кун ичида Буюртмачи ҳамда машҳур турк актёри Бурак Ўзчивит билан имзоланган шартнома (келишув) тақдим этиш мажбуриятини олади.

Тўлов тартиби

Шартнома имзоланганидан сўнг 3 банк иш куни ичида умумий сумманинг 50 фоизи олдиндан тўлаб берилади. Қолган қисми эса ишлар босқичма-босқич бажарилишига қараб тўланади.

Шунингдек, тендерда қатнашиш учун закалат миқдори ҳам белгиланган бўлиб, у битим суммасининг 3 фоизини ташкил этади.