Тошкентда 816 минг кв метр йўл таъмирланади
Пойтахт кўчаларидаги йўлларни фаол таъмирлаш март ойидан бошланиши маълум қилинди.
Тошкент шаҳри ҳокимлиги кучли ёғингарчилик ва юқори намлик туфайли кўчаларда чуқурлар сони ошганини маълум қилди. Расмий баёнотга кўра, йўл қопламаси қишки эскириш, музлашга қарши реагентлар қўлланиши ҳамда узоқ давом этган ёғинлар сабабли кучли юкланишга учраган.
Йўллар ёмонлашиши сабаби
Ҳокимлик таъкидлашича, сув микроёриқларга кириб, қопламанинг устки қатлами ва асосини заифлаштирган. Бу эса айниқса ҳаракат жадал бўлган марказий кўчаларда нуқсонларнинг тез намоён бўлишига олиб келган. Натижада ҳайдовчилар чуқурларни айланиб ўтишга мажбур бўлмоқда, айрим ҳолларда эса автомобил шиналарига шикаст етмоқда.
Маълумотларга кўра, жами 816 минг квадрат метр йўл қопламасини қайта тиклаш талаб этилади. Шундан 206,3 минг квадрат метр майдон марказий кўчалар ҳиссасига тўғри келади.
Туманлар бўйича тақсимот (m²):
Бектемир тумани — 53 160
Мирзо Улуғбек тумани — 50 471
Миробод тумани — 52 287
Олмазор тумани — 48 087
Сергели тумани — 50 529
Учтепа тумани — 50 000
Чилонзор тумани — 54 000
Шайхонтоҳур тумани — 51 182
Юнусобод тумани — 47 546
Яккасарой тумани — 51 000
Янгиҳаёт тумани — 51 000
Яшнобод тумани — 50 411
Расмийлар қайд этишича, ҳозирги об-ҳаво шароитида тўлиқ таъмир ишларини бошлаш кутилган самарани бермайди. Йўл асосининг намлиги юқори бўлгани боис, асосий ишлар об-ҳаво барқарорлашгач амалга оширилади. Фаол босқич март ойининг биринчи ўн кунлигида старт олиши режалаштирилган.
