Трамп Эрон билан келишувга эришиши натижасида нефт нархи кескин пасайди
АҚШ ва Эрон ўртасида урушни якунлаш ҳамда Ҳормуз бўғозини қайта очиш бўйича келишувга эришилгани ҳақидаги хабар глобал бозорларда ижобий кайфият уйғотди. Натижада нефт нархи кескин арзонлашиб, бир баррел учун 83,25 долларгача тушди.
© aol.comДоналд Трамп АҚШ ва Эрон расмийлари урушни тугатиш ва Ҳўрмуз бўғозини қайта очиш бўйича келишувга эришгани ҳақида маълум қилди.
«Эрон Ислом Республикаси билан келишув якунланди», - деб ёзди АҚШ президенти «Truth Social» платформасида. Дастлабки келишув нефт нархининг пасайишига олиб келди, аммо Эроннинг ядровий дастури тақдирини кейинги музокараларга қолдирди. Ўзаро келишув меморандуми 19 июн куни Швейсарияда имзоланиши режалаштирилган.
Келишув шартлари тўлиқ маълум қилинмади, бироқ Покистон Бош вазири Шаҳбоз Шариф Х'даги постида шартнома Ливандаги ҳарбий операцияларни бутунлай тўхтатишни талаб қилишини айтди. Шунингдек Эрон Олий Миллий Хавфсизлик Кенгаши котибияти ўз баёнотида Ливанни ҳам ўз ичига олган уруш ва ҳарбий операциялар душанба оқшомидан бошлаб бутунлай тўхтатилиши ҳақида хабар қилди.
Нефт нархи март ойидан буён энг паст даражага тушди
Уч ойдан ортиқ вақт давомида нефт ва суюлтирилган табиий газ таъминотининг бешдан бир қисми учун тўсиқ бўлган Ҳўрмуз бўғозининг ёпиб қўйилгани миллионлаб баррел нефт ва газ таъминотининг йўқотилишига сабаб бўлди. Ушбу келишувдан сўнг нефт нархлари март ойидан бери энг паст кўрсаткични қайд этди. Бугунги кунда бир баррель нефт нархи 4.7 фоизга пасайиб, 83.25 долларни ташкил этмоқда.
Аввалроқ АҚШ ва Эрон уруш ҳаракатларини вақтинча тўхтатиш, Ҳўрмуз бўғозидаги кескинликни юмшатиш, Эроннинг ядровий дастури ва музлатилган активлари бўйича келишувга эришиш учун дастлабки меморандум лойиҳасининг муҳокамаси ҳақида хабар қилинган эди.
